Sakar konung síðustu Vetrarólympíu­leika um svindl

„Það vita allir,“ sagði Jelena Välbe, hæstráðandi hjá rússneska skíðasambandinu. Expressen segir frá.

Hún heldur því fram að norska skíðalandsliðið hafi ekki keppt á flúorlausum skíðum í Mílanó og Cortina. Välbe er fyrrverandi skíðakona og núverandi yfirmaður rússneska skíðasambandsins en hún sakar Norðmenn um svindl í viðtali við rússnesku vefsíðuna sports.ru.

Vann sex gullverðlaun

Klæbo vann sex gullverðlaun á leikunum og hefur þar með unnið ellefu gullverðlaun á ferlinum á Vetrarólympíuleikum eða meira en allir aðrir í sögunni.

Notkun flúoráburðar er bönnuð og öll skíði eru skoðuð fyrir keppni, meðal annars til að tryggja að áburðurinn sem notaður er sé flúorlaus. En Välbe efast um að eftirlitið virki – og hvort það sé yfirhöfuð framkvæmt.

„Ég hef sagt áður að tækið sem þeir nota til að mæla er ekki hlutlægt, og það vita allir. Og hver getur borið vitni um að skíðin þeirra hafi yfirhöfuð verið skoðuð?“ sagði Välbe.

Hvernig er hægt að hefna sín svona

Auk þess að saka Klæbo og Noreg um svindl kvartar Välbe í viðtalinu yfir því að Rússum sé ekki leyft að taka þátt í alþjóðlegum skíðakeppnum, sem hún telur vera tap fyrir skíðaheiminn.

Þar að auki gagnrýnir hún að Klæbo hafi, að sögn Välbe, sagt að hann hafi á Ítalíu hefnt sín eftir Ólympíuleikana í Peking 2022. Þar fékk Norðmaðurinn „aðeins“ tvö gull, á meðan Rússinn Alexandr Bolsjunov tók heim þrjú.

„Hvernig er hægt að hefna sín fyrir Peking þegar sá sem tók verðlaunin af þér er ekki hér? Þeir mættust ekki í beinu einvígi núna, svo þetta er allt bara innantómt tal,“ sagði Välbe.

Ekkert styður svindlásakanir Välbe.