Eini Ólympíufari Írana kemst ekki

Khatibi var eini keppandi þjóðarinnar en hann kemst ekki á öruggan hátt til Ítalíu vegna vaxandi stríðsátaka í Mið-Austurlöndum, að því er Alþjóðaólympíunefnd fatlaðra staðfesti.

Tilkynningin um að Aboulfazl Khatibi muni ekki keppa kom aðeins nokkrum klukkustundum fyrir setningarhátíðina í Veróna. Leikarnir hófust innan við viku eftir að Bandaríkin og Ísrael hófu hernaðarárás á Íran.

„Vegna yfirstandandi átaka í Mið-Austurlöndum getur keppandinn, sem tók þátt á Ólympíumóti fatlaðra í Pyeongchang 2018 og Peking 2022, ekki ferðast á öruggan hátt til Ítalíu,“ sagði Alþjóðaólympíunefnd fatlaðra.

Andrew Parsons, forseti IPC, sagði að skipuleggjendur Ólympíumótsins hefðu „unnið sleitulaust á bak við tjöldin“ með Ólympíumótsnefnd fatlaðra í Íran að því að „finna aðrar leiðir fyrir örugga ferð írönsku sendinefndarinnar á leikana“. 

Hann sagði hins vegar að „vegna yfirstandandi átaka í Mið-Austurlöndum væri hættan á manntjóni of mikil“.

Parsons sagði að samskipti við Ólympíumótsnefnd fatlaðra í Íran hefðu ekki verið auðveld þar sem fjarskiptakerfi lægju niðri víða um landið.

„Það er átakanlegt fyrir íþróttamanninn að geta ekki keppt á Vetrarólympíumóti fatlaðra vegna aðstæðna sem hann hefur enga stjórn á, eftir margra ára þjálfun og elju, og við vottum Aboulfazl samúð okkar á þessum erfiðu tímum,“ sagði Parsons.

Khatibi átti að keppa í tveimur greinum í paraskíðagöngu sem hefst í næstu viku. 

Tilkynnt hafði verið að hann yrði fánaberi Írans en hann ætlaði þó ekki að bera fánann sjálfur; sjálfboðaliðar munu sinna því verkefni fyrir allar þjóðir þar sem ekki allir fánaberar komast á hátíðina vegna skipulags- og þjálfunarástæðna. 

Fáni Írans var því fjarlægður úr skrúðgöngu þjóðanna á setningarhátíðinni.