Keppir á Steraleikunum en ætlar líka á næstu Ólympíu­leika

Tilraun Armstrongs til að keppa á báðum mótunum mun reyna á viðleitni Alþjóðasundsambandsins til að draga skýr mörk milli hefðbundins sundheims og Enhanced Games, nýrra samtaka sem leyfa (en krefjast ekki) að íþróttafólk noti mörg þeirra efna sem eru bönnuð í öðrum íþróttagreinum.

Hinn 25 ára gamli Armstrong átti áður heimsmet í 50 metra baksundi en hann sagði í samtali við ESPN að hann hygðist keppa um hátt verðlaunafé á Enhanced Games án þess að taka nein bönnuð efni.

Armstrong telur að svo lengi sem hann fylgdi áfram lyfjaprófunaráætlun íþróttafólks á vegum Alþjóðasundsambandsins ætti hann áfram að eiga möguleika á sæti í framtíðarólympíuliðum Bandaríkjanna.

Armstrong sagði að þátttaka í Steraleiknum væri eini kostur hans til að halda áfram að stunda sund af fullum krafti. Hann sagðist hafa íhugað að hætta keppni síðasta sumar eftir að aðalstyrktaraðili hans sleit skyndilega samstarfinu við hann, sem varð til þess að hann gat ekki greitt reikninga sína.

„Ef ég tek ekki þátt í Enhanced Games þá missi ég allt. Ef ég tek þátt í Enhanced Games þá á ég möguleika á að missa ekki allt,“ sagði Armstrong. 

„Ég var kominn út í horn, svo ég varð að taka upp þetta samtal aftur til að sjá hvort þetta væri raunhæfur kostur,“ sagði Armstrong.