Látinn hrauna yfir Kanada í gervi­mynd­bandi Hvíta hússins

Myndbandið birtist á opinberum TikTok-reikningi Hvíta hússins eftir að Bandaríkin unnu Kanada í úrslitaleiknum á Vetrarólympíuleikunum á sunnudaginn. Þar eru Tkachuk lögð orð í munn og látið eins og að hann hafi sagt: 

„Þeir bauluðu á þjóðsönginn okkar svo að ég varð að kenna þessum hlynsýrópsétandi fávitum lexíu. Kanada, við ráðum yfir ykkur litli brósi.“

Klippan af Tkachuk er af blaðamannafundi frá síðasta ári og alveg ljóst að það er ekki hann sem talar á myndbandinu.

Tkachuk er fyrirliði Ottawa Senators í Kanada og hann var spurður út í myndbandið eftir fyrsta leik sinn í NHL-deildinni eftir Ólympíuleikanna.

„Tja, þetta er augljóslega gervimyndband, því þetta er ekki röddin mín og varirnar mínar hreyfast ekki.

Ég ræð ekki yfir þessum reikningum. Ég veit bara að þessi orð myndu aldrei koma af mínum vörum, svo ég get ekkert gert við þessu. Ég myndi aldrei segja þetta. Svona maður er ég ekki. Svo ég býst við að ég sé ekki ánægður með þetta myndband,“ sagði Tkachuk.

Donald Trump Bandaríkjaforseti var afar ánægður og stoltur af landsliðinu og bauð því að vera viðstatt stefnuræðu sína á þriðjudaginn. Forsetinn hringdi í liðið þegar það var að fagna sigrinum inni í búningsklefa en kvaðst í símtalinu neyðast til að bjóða líka kvennalandsliðinu sem einnig hafði unnið Kanada í úrslitaleik.

Brandari Trumps og hlátur sumra af leikmönnum karlaliðsins hefur verið gagnrýndur og kvennaliðið afþakkaði boðið pent.

Sumir af leikmönnum karlaliðsins hafa svo beðist afsökunar á viðbrögðum sínum en Hilary Knight, fyrirliði kvennaliðsins, sagði að þó að brandari Trumps hefði verið óviðeigandi þá hefði hún skilning á viðbrögðunum og að sambandið á milli landsliðanna væri fullt af trausti og stuðningi.