Drukkin í út­sendingu og baðst af­sökunar

Danika Mason kom inn í beina útsendingu í morgunþætti Channel 9 í Ástralíu í gær og ætlaði þar að veita innsýn í lífið á Ólympíuleikunum og fara yfir helstu íþróttafréttir.

Eins og sjá má á myndbandinu hér að neðan gekk henni ekkert frábærlega að koma orðunum frá sér, að minnsta kosti ekki með skýrum hætti, á meðan hún talaði um kaffiverðið á Ítalíu og reyndar einnig um eðlur (e. iguanas), væntanlega í tengslum við eitthvað sem þáttastjórnendur höfðu áður nefnt.

Viðbrögðin á samfélagsmiðlum voru blendin, samkvæmt frétt BBC, og vildu sumir að Mason yrði rekin á stundinni fyrir að vera drukkin í útsendingu á meðan að aðrir lýstu yfir ánægju með að hún virtist njóta sín á leikunum.

„Kalda veðrið getur haft sín áhrif. Maður getur varla hreyft varirnar,“ sagði þáttastjórnandinn Karl Stefanovic sem var í stúdíóinu heima í Ástralíu, líkt og til að afsaka Mason. Heyra hafði mátt í honum hlæja þegar Mason reyndi að koma orðunum út úr sér.

Mason baðst afsökunar í dag á framferði sínu, þrátt fyrir að forsætisráðherrann Anthony Albanese hefði til að mynda sagst standa með henni og að „hér væri ekkert að sjá“.

„Það er í lagi með mig, ég skammast mín líklega bara smá,“ sagði Mason og hélt áfram:

„Ég mislas gjörsamlega í aðstæður. Ég hefði ekki átt að fá mér drykk, sérstaklega ekki í þessum aðstæðum. Það er kalt, við erum hátt uppi, og það hjálpaði eflaust ekki til að ég var ekki búin að borða kvöldmat. En ég tek fulla ábyrgð og þetta er ekki í samræmi við þær kröfur sem ég geri til sjálfs míns,“ sagði Mason.

„Hafandi sagt það þá þykir mér þetta virkilega leitt en ég er líka þakklát fyrir öll skilaboðin sem ég hef fengið,“ sagði Mason og Jayne Azzopardi, þáttastjórnandi, svaraði þá og sagði alla vita hve mikla vinnu hún legði á sig.