„Hann var stressaður og það var svo krútt­legt“

Eftir að hafa komist í úrslit í stökki í skíðafimi skrifaði Kotsar „frelsi minningarinnar“ á hanskann sinn til að mótmæla banni sem samlandi hennar, Vladyslav Heraskevych, fékk fyrir að vera með myndir af föllnum íþróttamönnum á hjálminum sínum. Og Valentínusardagurinn sem hún mun aldrei gleyma tók aðra óvænta stefnu þegar kærasti hennar, Bohdan Fashtryha, fór á skeljarnar og bað hennar.

Skil ekki alveg hvað gerðist í kvöld

„Hann spurði á úkraínsku hvort ég vildi giftast honum, ekkert annað,“ sagði Kotsar. „Hann var stressaður og það var svo krúttlegt. Ég er enn þá spennt og skil ekki alveg hvað gerðist í kvöld, því þetta eru tveir virkilega stórir hlutir fyrir mig,“ sagði Kateryna Kotsar.

Kotsar, sem lenti í ellefta sæti í undankeppninni, sýndi glitrandi demantshringinn sinn og viðurkenndi að hún hefði ekki búist við bónorðinu.

Í dag fékk ég þá tilfinningu

„Yfirleitt fæ ég á tilfinninguna að eitthvað frábært sé að fara að gerast,“ sagði hún. „Í dag fékk ég þá tilfinningu, en ég hélt að það væri vegna þess að komast í úrslit. Ég var með slæma tilfinningu í gær, mér leið illa. Í dag var stærsta markmiðið mitt að klára og gera hrein stökk, en þau voru nógu hrein til að komast í úrslit. Nú er ég full af orku,“ sagði Kotsar.

Hin 25 ára gamla íþróttakona frá Kænugarði mun keppa á móti ríkjandi Ólympíumeistaranum Eileen Gu og tíu öðrum íþróttamönnum í úrslitum í stökki í dag en hún viðurkenndi að hún myndi hugsa til samlanda sinna heima fyrir.

„Þú býrð án rafmagns, án hita, án möguleika á að þvo fötin þín og gera nokkuð einfalda hluti,“ sagði hún. „Yfirleitt förum við á flestar snjóæfingar okkar erlendis, til Austurríkis, Ítalíu og Sviss, en ég hef samt nægan tíma í Úkraínu til að fara í ræktina og á trampólínæfingar,“ sagði Kotsar.