Rústaði á sér fótunum en varð samt stjarna leikanna

Brignone hálfrústaði á sér fótunum þegar hún féll í brekkunni á síðasta ári og bæði fótbrotnaði og sleit krossband í hné. Hún gat ekki gengið eðlilega í fimm mánuði.

„Mantran mín var sú að morgundagurinn yrði betri,“ sagði Brignone samkvæmt Washington Post, og það átti svo sannarlega eftir að verða raunin.

Samt var Brignone alls ekki bjartsýn fyrir leikana, skiljanlega, eftir allt sem á undan var gengið. 

„Ég ætti ekki að vera hérna“

Á æfingu fyrir aðeins níu dögum sagði hún:

„Það er enn mikill sársauki. Ég er ekki enn hundrað prósent. Ég meina, ég er ekki einu sinni 80 prósent. En svona er þetta og ég hef engar afsakanir. Ég reyni mitt besta. Ég ætti ekki að vera hérna svo ég er ánægð með að vera hér.“

Brignone var sem sagt full af auðmýkt yfir því að geta yfir höfuð verið með á leikunum í heimalandi sínu en tók sig svo til og vann sinn fyrsta Ólympíumeistaratitil, í risasviginu.

Hún bætti svo við öðrum gullverðlaunum í stórsviginu í dag. Hin sænska Sara Hector og hin norska Thea Louise Stjernesund enduðu á sama tíma og deildu því silfurverðlaununum. Þær enduðu 62/100 úr sekúndu á eftir Brignone sem gladdi alla ítölsku þjóðina og kannski ekki síst pabba sinn eins og sjá mátti á Eurosport á Ítalíu.