Fjögur ráðin til Cirkus aug­lýsinga­stofu

Frá þessu segir í tilkynningu. Þar segir að Habiba hafi hafið störf sem grafískur hönnuður. 

„Hún er margmiðlunarlistakona frá Kaíró í Egyptalandi, en flutti hingað til lands í fyrra. Hún er með BA gráðu í Applied Arts frá German University í Kaíró, með áherslu á mörkun og teikningu. Hún hefur um árabil starfað sem sjálfstæður hönnuður, samhliða störfum sem húðflúrari, en hún rak eigin húðflúrsstofu í Kaíró.

Sigríður Hulda kemur einnig inn í hönnunarteymið, en hún útskrifaðist með BFA í grafískri hönnun frá Listaháskóla Íslands árið 2014 og MFA í Visual Communication frá Konstfack listaháskólanum í Stokkhólmi árið 2017. Þar í landi starfaði hún um árabil hjá Kate designstudio sem listrænn stjórnandi, en hefur auk þess víðtæka reynslu sem sjálfstætt starfandi hönnuður og hefur hannað fjölda vefsíða, plötuumslaga, bókakápa o.fl.

Ómar er nýr hreyfihönnuður og teiknari hjá Cirkus. Hann sérhæfir sig í hreyfimyndagerð fyrir auglýsingar og handteiknuðu efni. Ómar hefur teiknað myndasögur og teiknimyndir frá barnæsku, en árið 2023 útskrifaðist hann úr Vancouver Film School með gráðu í klassískri teiknimyndagerð.

Að lokum kemur Sólveig inn sem viðskiptastjóri, en hún útskrifaðist með BS próf í hagfræði frá Háskóla Íslands árið 2020 og hefur starfað sem sérfræðingur í greiningum hjá Hagstofu Íslands. Hún er einnig þáttastjórnandi hlaðvarpsins Bragðheima,“ segir í tilkynningunni.