Njarð­vík vann nýliðana í fram­lengingu og Stólarnir sóttu sigur til Þor­láks­hafnar

Ármann leit út fyrir að ætla að vinna Njarðvík í kvöld en nýliðarnir köstuðu frá sér sigrinum á lokamínútunum.

Ármannskonur voru sex stigum yfir þegar 30 sekúndur voru eftir af leiknum, en þá setti Brittany Dinkins þrist fyrir Njarðvík og minnkaði muninn.

Jónína Þórdís Karlsdóttir klikkaði svo á tveimur vítum í næstu sókn Ármanns og Brittany jafnaði fyrir Njarðvík með öðrum þristi þegar 16 sekúndur voru eftir.

Ármannskonur klikkuðu bæði á þriggja stiga skoti og sneiðskoti í síðustu sókn leiksins. Með jafna 67-67 stöðu þurfti þá að draga til framlengingar.

Ármann skoraði ekki nema sex stig gegn átján hjá Njarðvík í framlengingu, orka nýliðanna var alveg á þrotum og Njarðvík fagnaði 85-73 sigri.

Með þessum sigri jafnaði Njarðvík topplið KR og Hauka að stigum en öll þrjú efstu liðin hafa unnið tólf og tapað fimm leikjum.

Marta og Madison tryggðu Tindastólssigur

Hamar/Þór og Tindastóll háðu harða baráttu en heimakonur í Þorlákshöfn voru með forystuna þegar fjórði leikhlutinn gekk í garð.

Stólarnir áttu hins vegar meira eftir af orku undir lok leiks og sigldu fram úr fjórða leikhluta. 79-87 sigur Tindastóls varð að lokum staðreynd.

Marta Hermida og Madison Sutton fóru mikinn á þeim kafla fyrir Tindastólskonur.

Marta var líka langstigahæst í leiknum með 34 stig. Madison fylgdi henni eftir í stigasöfnun með 20 stig og greip flest fráköst allra, 12 talsins. Roselis Silva sá um að dreifa spilinu og gaf 10 stoðsendingar.

Hjá Hamar/Þór var Jadakiss Nashi Guinn framlagshæst, með 20 stig, 4 fráköst og 5 stoðsendingar.

Hamar/Þór er í neðsta sæti deildarinnar með fjögur stig en Tindastóll er í 8. sæti með tólf stig.