Ein­kunnir Strákanna okkar á móti Dan­mörku: Hetjuleg frammi­staða gegn heimsmeisturunum

Ísland byrjaði leikinn vel og komst þremur mörkum yfir, 3-6. Danmörk svaraði með 6-2 kafla og liðin héldust í hendur það sem eftir lifði fyrri hálfleiks. Danir voru einu marki yfir í hálfleik, 14-13, þrátt fyrir Íslendingar hafi ekki skorað í rúmar átta mínútur um miðbik fyrri hálfleiks.

Ísland skoraði fyrstu tvö mörkin í seinni hálfleik og leikurinn var í járnum. Gísli Þorgeir Kristjánsson kom Íslendingum yfir, 18-19, en það var í síðasta sinn sem íslenska liðið var með forystuna í leiknum.

Danir skoruðu sex af næstu átta mörkum og náðu þriggja marka forskoti, 24-21. Íslendingar voru í eltingarleik það sem eftir lifði leiks og Danir lönduðu þriggja marka sigri, 31-28. 

Markvarslan hjá íslenska liðinu var takmörkuð og þá fóru fjögur víti í súginn. Kevin Möller átti góða innkomu í danska markið um miðbik seinni hálfleiks og reyndist okkar mönnum erfiður.

Janus Daði Smárason átti frábæran leik í kvöld og var markahæstur í íslenska liðinu með átta mörk. Orri Freyr Þorkelsson skoraði sjö mörk, þar af sex úr vítum, og Ómar Ingi Magnússon var með sex mörk.

Ísland mætir Króatíu í leiknum um 3. sætið klukkan 14:15 á sunnudaginn.

Einkunnir Íslands gegn Danmörku: 

- Byrjunarlið Íslands í leiknum -

Viktor Gísli Hallgrímsson, markvörður - 2 (10/1 varin skot - 56:41 mín.) Íslenska vörnin var sterk nær allan tímann en markvarslan fylgdi ekki með. Viktor varði tíu skot en í fjögur skipti var aukakast dæmt. Viktor hefur átt misjafna leiki á EM og leikurinn í kvöld var ekki einn af hans bestu.

Orri Freyr Þorkelsson, vinstri hornamaður - 4 (7/6 mörk - 53:38 mín.) Tók við vítaskyldunum eftir að Viggó Kristjánsson og Ómar Ingi Magnússon höfðu báðir klikkað. Skoraði af feykilegu öryggi úr fyrstu fimm vítunum sínum en brást bogalistin í tveimur af síðustu þremur. Skoraði úr eina færinu sem hann fékk í vinstra horninu.

Janus Daði Smárason, vinstri skytta - 5 (8 mörk - 48:36 mín.) Frábær frammistaða hjá Janusi sem spilaði einn sinn besta landsleik í kvöld. Byrjaði af miklum krafti og skoraði tvö af fyrstu þremur mörkum Íslands. Skoraði svo sex mörk í seinni hálfleik og hélt íslenska liðinu inni í leiknum þegar líða tók á leikinn. Fékk það afar erfiða verkefni að eiga við Mathias Gidsel í vörninni. Hann gerði allt sem hann gat en það er nær ómögulegt að eiga við dönsku skyttuna. Hetjuleg framganga hjá Janusi. 

Gísli Þorgeir Kristjánsson, leikstjórnandi - 3 (2 mörk - 41:37 mín.) Danir lögðu gríðarlega áherslu á að stöðva Gísla og brutu ítrekað á honum. Hann þurfti að hafa mikið fyrir hlutunum og komst ekki jafn mikið áleiðis og í fyrri leikjum mótsins. Stýrði sóknarleiknum samt af öryggi, skoraði tvö mörk, gaf fimm stoðsendingar og fiskaði tvö víti. Gaf allt sem hann átti í leikinn.

Ómar Ingi Magnússon, hægri skytta - 4 (6 mörk - 53:16 mín.) Fyrirliðinn fylgdi eftir frábærum leik gegn Slóveníu í fyrradag. Skoraði fjögur mörk í röð í byrjun leiks og endaði með sex mörk. Gaf auk þess fjórar stoðsendingar og fiskaði fjögur víti. Góð frammistaða hjá Ómari, bæði í vörn og sókn.

Óðinn Þór Ríkharðsson, hægri hornamaður - 3 (1 mark - 39:07 mín.) Fékk úr litlu að moða í kvöld. Íslenska liðið fékk nær engin hraðaupphlaup þar sem Óðinn blómstrar vanalega. Fékk tvö færi í horninu og nýtti annað þeirra.

Elliði Snær Viðarsson, línumaður - 4 (3 mörk - 51:35 mín.) Sá sem hefur vaxið á þessu móti! Stóð í ströngu í vörninni, barðist eins og ljón og lét svo heldur betur til sín taka í sókninni. Nýtti öll þrjú skotin sín af línunni og fiskaði aukinheldur þrjú vítaköst.

Ýmir Örn Gíslason, varnarmaður - 4 (0 mörk - 30:07 mín.) Fékk afar erfitt verkefni í hendurnar, að eiga við besta sóknarlið heims, og stóð sig með prýði. Var á fullu allan tímann og þeir Elliði náðu vel saman í miðri vörninni.

- Menn sem komu inn af bekknum í leiknum -

Arnar Freyr Arnarsson, línumaður - (0 mörk - 5:41 mín.) Spilaði of lítið til að fá einkunn.

Viggó Kristjánsson, hægri skytta - 2 (1/1 mark - 18:12 mín.) Byrjaði á klikka á víti en skoraði úr öðru undir lokin. Íslenska liðið hefði þurft eitthvað aukalega frá bekknum í kvöld en fékk ekki. Viggó gerði þó ágætlega í vörninni og leysti stöðu hornamanns um tíma í seinni hálfleik. 

Haukur Þrastarson, vinstri skytta - 2 (0 mörk - 12:50 mín.) Spilaði ekki mikið. Klikkaði á eina skotinu sem hann tók en átti ágætis kafla í vörninni.

Björgvin Páll Gústavsson, markvörður - (34 sek.) Reyndi að verja tvö vítaköst en án árangurs.

Einar Þorsteinn Ólafsson, varnarmaður - (0 mörk - 2:06 mín.) Kom inn á undir lokin með það verkefni að sprengja leikinn upp.

Teitur Örn Einarsson, hægri hornamaður - (0 mörk - 2:03 mín.) Kom aðeins inn í byrjun seinni hálfleiks þegar Óðinn fékk brottvísun.

Þorsteinn Leó Gunnarsson, vinstri skytta - (0 mörk - 0 mín.) Tók aukakast eftir leiktíminn í fyrri hálfleik var runninn en skaut í varnarvegginn.

Bjarki Már Elísson, vinstri hornamaður - (spilaði ekkert)

Líkt og áður þá gefur íþróttadeild Vísis og Sýnar leikmönnum einkunnir fyrir frammistöðu sína.

Leikmenn fá einkunn á bilinu 1-6 með umsögn, en neðst í fréttinni má sjá hvað hver einkunn þýðir.

Útskýring á einkunnum