Kín­verjar með lang­mesta viðskiptaafgang sögunnar

Kína hefur ekki verið með viðskiptahalla frá árinu 1993.

Útflutningur frá Kína jókst um 5,5 prósent á milli ára, þrátt fyrir tolla Donalds Trump, forseta Bandaríkjanna, gegn Kína en margir hagfræðingar bjuggust við því að þeir myndu koma niður á útflutningi frá Kína.

Samkvæmt frétt Wall Street Journal dróst útflutningur frá Kína til Bandaríkjanna saman um tuttugu prósent á milli ára en Kínverjar fundu nýja viðskiptavini annars staðar í heiminum sem endaði með áðurnefndum viðskiptaafgangi upp á 150 billjónir króna (150.000.000.000.000).

Útflutningur Kína til Suðaustur-Asíu jókst um þrettán prósent. Útflutningur til Evrópu jókst um 8,4 prósent og útflutningur til Suður-Ameríku jókst um 7,4. Langmest aukning var þó þegar snýr að Afríku en aukningin var heil 26 prósent.

Í frétt New York Times segir að útflutningur frá Kína til annarra heimssvæða hafi að miklu leyti endað í Bandaríkjunum. Innflytjendur þar hafi notað milliliði til að komast hjá tollum Trumps.

Þá hefur lækkun í virði gjaldmiðils Kína einnig gert útflutning auðveldari, þar sem vörur þaðan eru ódýrari og innflutningur dýrari.

Sagðir treysta of mikið á útflutning

Innflutningur Kínverja stóð svo gott sem í stað á milli ára en ráðamenn þar hafa lagt mikla áherslu á að auka sjálfbærni í fjölmörgum geirum.

Greinendur hafa um nokkurt skeið haft áhyggjur af hagkerfi Kína og þá sérstaklega vegna þess hve mikið hann reiðir á útflutning. Alþjóðagjaldeyrissjóðurinn hefur til að mynda varað við því og sagt að hagkerfið, sem er það annað stærsta í heiminum, sé of stórt til að treysta á útflutning.

Aðrir, bæði utan landamæra Kína og innan þeirra, hafa kallað eftir því að meiri áhersla verði lögð á neyslu. Framleiðsla og útflutningur hafa aukist til muna í ríkinu en fasteignakerfið og neysla heimila hefur dregist á eftir.

Fasteignahrun í Kína hefur á undanförnum árum þurrkað út sparnað margra og kaupmáttur margra kínverskra fjölskyldna hefur dregist saman hvort sem snýr að innfluttum vörum eða vörum framleiddum í Kína.