Lög­menn frá Juris til LEX

Í tilkynningu segir að Stefán sé auk þess formaður Lögmannafélagsins. 

Stefán og Finnur ganga til liðs við LEX sem eigendur en Sigurbjörn sem ráðgjafi. Auk þessara þriggja fylgja aðrir reyndir lögmenn á LEX frá Juris, Jóhannes Tómasson, Dagur Fannar Jóhannesson og Þórarinn Þorgeirsson.

„Finnur Magnússon er lögmaður með leyfi til málflutnings fyrir Hæstarétti. Hann lauk LL.M. námi við háskólann í Vínarborg og doktorsnámi við sama háskóla árið 2013. Finnur hefur starfað sem lögmaður frá árinu 2002, aðallega á sviði fjármálalöggjafar og félagaréttar. Finnur kennir við lagadeildir Háskóla Íslands og Háskólans í Reykjavík og hefur verið gestafræðimaður við Háskólann í Cambridge. Finnur hefur flutt fjölda mála fyrir héraðsdómstólum, Landsrétti og Hæstarétti, auk þess að flytja mál fyrir EFTA-dómstólnum. Frá 2015 hefur Finnur verið tilnefndur af utanríkisráðuneytinu til að taka sæti á lista gerðardómara við ICSID stofnunina í Washington. Í umsögnum alþjóðlegra matsfyrirtækja, s.s. Chambers og Legal 500, hefur Finns verið getið á lista yfir lögmenn sem mælt er með.

Stefán A. Svensson er lögmaður með leyfi til málflutnings fyrir Hæstarétti. Hann lauk LL.M. námi í viðskiptarétti við Cambridge háskóla árið 2008. Stefán hefur starfað sem lögmaður frá árinu 2005 og er lektor við lagadeild Háskólans í Reykjavík. Þá hefur hann gegnt trúnaðarstörfum fyrir Lögmannafélag Íslands og var kjörinn formaður Lögmannafélags Íslands árið 2024. Stefán hefur flutt fjölda mála meðal annars á sviði viðskiptaréttar, þ.m.t. fordæmisgefandi mál, fyrir íslenskum dómstólum og hefur einnig flutt mál fyrir EFTA-dómstólnum ásamt því að hafa verið kvaddur sem sérfræðivitni um íslenskan rétt í þrígang fyrir enskum dómstólum og einu sinni fyrir alþjóðlegum gerðardómi. Í umsögnum alþjóðlegra matsfyrirtækja, þ.á.m. Chambers og Legal 500, hefur Stefáns ítrekað verið getið á lista yfir þá lögmenn sem sérstaklega er mælt með.

Sigurbjörn Magnússon er reynslumikill lögmaður með leyfi til málflutnings fyrir Hæstarétti. Hann lauk cand. jur. námi við lagadeild Háskóla Íslands árið 1985 og hefur starfað sem lögmaður frá árinu 1990. Sigurbjörn sinnir hagsmunagæslu fyrir fyrirtæki í sjávarútvegi, innflutnings- og útflutningsfyrirtæki, fjölmiðlafyrirtæki, o.fl., en sérsvið hans eru fyrirtækja- og viðskiptaréttur, málflutningur og úrlausn deilumála, eignaréttur, samkeppnisréttur o.fl.

LEX er ein stærsta og elsta lögmannsstofa á Íslandi með yfir 50 starfsmenn og þar af 17 eigendur. Stjórn félagsins skipa lögmennirnir Stefán Orri Ólafsson stjórnarformaður, Lára Herborg Ólafsdóttir og Guðmundur Ingvi Sigurðsson,“ segir í tilkynningunni.

Haft er eftir Láru Herborgu Ólafsdóttur, einum eiganda og stjórnarmanni hjá LEX, að það sé „mikill styrkur fyrir stofuna að fá þennan öfluga hóp reynslumikilla lögmanna til liðs við LEX og fellur vel að þeirri stefnu sem við höfum markað um áframhaldandi vöxt, gæði og sérhæfingu.“