Telja vegið að eignar­rétti Sýnar

 Héraðsdómur Reykjavíkur samþykkti í síðustu viku flýtimeðferð í máli Sýnar gegn Fjarskiptastofu og Símanum vegna kröfu Sýnar um ógildingu ákvörðunar Fjarskiptastofu um að skikka Sýn til að heimila Símanum að sýna efni Sýnar.

Í ágúst kærði Sýn ákvörðun Fjarskiptastofu til úrskurðarnefndar fjarskipta- og póstmála. Niðurstaða nefndarinnar fól í sér verulega styttingu á gildistíma bráðabirgðaákvörðunar Fjarskiptastofu. Þar var fallist á kröfu Sýnar að hluta.

Sýn sendi frá sér fréttatilkynningu í kvöld þess efnis að félagið hafi móttekið ákvörðun Fjarskiptastofu. 

„Samkvæmt ákvörðun Fjarskiptastofu er það niðurstaða stofnunarinnar að markaðsráðandi fjarskiptafyrirtæki geti krafist aðgangs að efni í opinni dagskrá sjónvarpsstöðvarinnar SÝN án þess að bera af því kostnað,“ segir í tilkynningunni.

„Að mati Sýnar felur slík niðurstaða í sér verulegt frávik frá þeim sjónarmiðum sem liggja að baki eignarréttarákvæðum stjórnarskrárinnar og meginreglum samkeppnisréttar.“

Feli í sér eignaupptöku

Þá segir að íslenskir einkareknir fjölmiðlar heyi harða baráttu við alþjóðlega tæknirisa og ríkisrekna miðla. 

„Að Fjarskiptastofa skuli á sama tíma beita stjórnvaldsaðgerðum til að þvinga einkarekinn fjölmiðil til að niðurgreiða rekstur keppinautar síns orkar tvímælis,“ segir í tilkynningunni. Sýn fjárfesti árlega fyrir hundruð milljóna í innlendri dagskrárgerð og fréttaþjónustu. 

„Að Síminn fái aðgang að þessari fjárfestingu án þess að bera af því kostnað feli að öllum líkindum í sér eignaupptöku.“

Grafi undan hvata til reksturs fréttastofu

Þá kemur fram að forsvarsmenn Sýnar telji þá túlkun Fjarskiptastofu á fjölmiðlalögum að óheimilt sé að ákvarða eiganda efnis endurgjald þegar um frístöð er að ræða, ranga. 

„Væri þetta rétt túlkun eru lögin í andstöðu við eignarréttarákvæði stjórnarskrárinnar. Þar kemur skýrt fram að engan megi skylda til að láta af hendi eign sína nema fullt verð komi fyrir.“

Taka verði tillit til þeirrar fjárfestingar sem liggi að baki framleiðslu á íslensku efni. Ólíkt Símanum hafi Sýn ekki séð ástæðu til að óska sérstaklega eftir efni Símans í opinni dagskrá.

Páll Ásgrímsson, aðallögfræðingur Sýnar, segir grundvallaratriði að íslenskt sjónvarpsefni, sem miklu hefur verið kostað til við framleiðslu, verði ekki gert verðlaust með stjórnvaldsaðgerðum. 

„Ef skylda á fjölmiðil til að afhenda slík verðmæti til markaðsráðandi samkeppnisaðila þarf sú ákvörðun að byggjast á skýrri heimild og tryggja eðlilegt endurgjald. 

Þessi ákvörðun grefur undan hvata til að fjárfesta í íslensku efni og halda úti rekstri öflugrar fréttastofu. Sýn mun leita allra leiða til að fá þessari ákvörðun hrundið,“ er haft eftir Páli í fréttatilkynningu.

Vísir er í eigu Sýnar.