„Búið að vera stórt mark­mið hjá mér“

Alexandra Líf Arnarsdóttir gerðist formlega hluti af HM-hópnum í dag, vegna meiðsla Elísu Elíasdóttur, en hún var búin að vera í biðstöðu síðan hópurinn var tilkynntur og vissi að kallið gæti komið.

„Já við vorum með plan A og plan B, vildum sjá hvernig hlutirnir þróuðust, og svo er ég komin hingað… Arnar var búinn að biðja mig um að vera tilbúin og ég æfði með þeim vikuna fyrir [og fór með til Færeyja í æfingaleik], svo var bara geggjað þegar kallið kom“ sagði Alexandra sem er að spila á sínu fyrsta stórmóti.

„Þetta er búið að vera stórt markmið hjá mér, þannig að þetta er bara frábært… Foreldrar mínir ætla að koma og bróðir minn, sem er bara geggjað, að þau geti komið með svona stuttum fyrirvara.

Ég er mjög þakklát fyrir það og sérstaklega kannski af því að maður veit ekkert hversu mikið maður fær að spila, það er bara geggjað að þau skuli koma og styðja mann, sem þau gera reyndar alltaf“ sagði Alexandra brosandi og létt í bragði, þrátt fyrir langan og erfiðan ferðadag.

Eins og vinkonur í félagsliði

Línukonan er samt ekki alveg ókunnug landsliðinu, Alexandra spilaði sína fyrstu tvo landsleiki í vor í undankeppni HM gegn Ísrael og í HM-hópnum eru tveir liðsfélagar hennar úr Haukum. Auk þess hittir hún hér mágkonu sína, Elínu Klöru Þorkelsdóttur.

„Þær hafa allar tekið ótrúlega vel á móti mér. Maður hefur spilað með þeim nokkrum og spilað með einhverjum áður. Þetta eru í rauninni bara vinkonur manns, eins og í félagsliði“ sagði Alexandra að lokum en viðtalið má sjá í spilaranum hér fyrir neðan. 

Ísland hefur leik á HM gegn heimaliði Þýskalands á miðvikudaginn klukkan 17:00.