Selur hjörð en ekki jörð

„Ég hef gert mjög mikið af því að selja jarðir ýmist í rekstri eða án reksturs og líka kúabú í rekstri og þannig selt heilu hjarðirnar en þetta er í fyrsta skipti sem maður selur staka hjörð,“ segir Björgvin Guðjónsson fasteignasali í samtali við Vísi. Hjörðin hefur verið auglýst til sölu á tveimur Facebook hópum sem tengjast nautgripum og landbúnaði.

„Málið er mér skylt að því leytinu til að ég er sjálfur úr þessari starfsstétt, þó ég sé búinn að starfa miklu lengur sem fasteignasali heldur en í landbúnaði,“ útskýrir Björgvin.

Um er að ræða 31 mjólkandi kýr, þar af þrjár í geldstöðu, 24 óbornar kvígur, tólf mánaða og eldri, sex kvígur sex til tólf mánaða, átta kvígukálfa sem eru núll til sex mánaða, fimmtán naut sem eru tólf mánaða og eldri og átta nautkálfar núll til tólf mánaða gamlir. Gripirnir verða til sýnis að Akbraut, Rangárþingi ytra fimmtudaginn 20. nóvember milli 13:00 og 15:00. Óskað er eftir tilboðum og rennur tilboðsfrestur út klukkan 18:00 þann 24. nóvember.

Jörðin nýlega seld

„Þarna er verið að leggja þennan rekstur af, en þessi jörð var nýlega seld,“ segir Björgvin. Jörðin var auglýst til sölu fyrir rúmu ári. Á Fastanum kemur fram að uppsett verð hafi verið þrjúhundruð milljónir króna og jörðin seld sem kúabú í fullum rekstri. Var jörðinni lýst sem mjög fallegum útsýnisstað á bökkum Þjórsár og að allur bústofn, framleiðsluréttur, hey og véla- og tækjakostur til búskapar myndi fylgja við sölu.

Björgin segist þegar hafa fundið fyrir miklum áhuga á kaupum á hjörðinni, ekki síst vegna núverandi markaðsaðstæðna og sölu á mjólk. Tíminn verði hinsvegar að leiða í ljós hvort hún muni seljast í heilu lagi eða í hlutum. 

„Áhuginn er kannski ekki síst vegna þess að það er borgað töluvert fyrir umfram mjólk, mjólk sem er framleidd umfram kvóta og þar af leiðandi er það tiltölulega hagstætt fyrir þá sem hafa pláss og byggingar að nýta þennan glugga á meðan er.“