Stöðva rekstur Vélfags

Í tilkynningu þess efnis á Facebook segir að vegna ákvörðunar utanríkisráðuneytisins um að hafna framlengingu á undanþágu Vélfags ehf. frá þvingunaraðgerðum hafi félagið neyðst til að stöðva starfsemi sína tímabundið og senda alla starfsmenn heim á meðan beðið er dóms í máli félagsins gegn íslenska ríkinu. Ákvörðun ráðuneytisins hafi í reynd svipt félagið aðgengi að eigin fjármunum og gert því ómögulegt að sinna daglegum rekstri, þar með talið greiðslum til starfsfólks og þjónustu við viðskiptavini.

„Við erum miður okkar að geta ekki sinnt íslenskum og erlendum viðskiptavinum okkar á meðan, þar á meðal útgerðum sem reiða sig á þjónustu okkar og varahluti.“

Í tilkynningu utanríkisráðuneytisins í gær sagði að Vélfag hefði ítrekað grafið undan undanþágu sem það fékk frá þvingunaraðgerðum og því hafi framlengingu á henni verið hafnað. Vélfag hefur hafnað því að tengjast enn rússnesku félagi á þvingunarlista en stjórnarformaður þess hefur átt í viðskiptum við það á öðrum vettvangi.

Arion banki frysti fjármuni Vélfags í júlí á grundvelli alþjóðlegra þvingunaraðgerða gegn Rússlandi vegna fjölþáttaógnar þaðan sem Ísland tekur þátt í.

Ástæðan var ætluð tengsl Vélfags við rússneska félagið Norebo sem er talið tengjast svonefndum skuggaflota Rússa. Vélfag var selt aðeins þremur dögum áður en Norebo var sett á þvingunarlista og hafa grunsemdir verið uppi um að það hafi verið málamyndagjörningur.

Utanríkisráðuneytið veitti Vélfagi tímabundna undanþágu frá frystingunni í sumar en hafnaði beiðni félagsins um að framlengja hana í gær. Ekki væri forsvaranlegt að viðhalda undanþágunni vegna ítrekaðra tilrauna Vélfags til þess að grafa undan tilgangi og markmiði hennar.