Sam­bíóin í Mjóddinni víkja fyrir Nova

Sagt er frá flutningi Nova í tilkynningu frá félaginu, en Nova hefur verið til húsa í Lágmúla allt frá stofnun árið 2007. Stendur til að flytja í Álfabakka 8 í Mjódd „þar sem stærsti skemmtistaður Íslands, Broadway, var um tíma“. Broadway var í upphafi níunda áratugarins starfræktur í kjallara hússins þar sem Sambíóin starfsrækja bíó.

Sylvía Kristín Ólafsdóttir, forstjóri Nova, segir í samtali við Vísi að félagið muni vera með starfsemi í kjallaranum og á annarri og þriðju hæð hússins. Verslun muni sömuleiðis opna á staðnum. Hún segir að Sambíóunum verði lokað í árslok 2026 og þá verði ráðist í að breyta húsnæðinu. 

„Nova hefur gengið frá leigusamningi við Eignabyggð hf. um leigu á Álfabakka 8. Eignabyggð vinnur nú að heildar endurskipulagningu fasteignarinnar og gert er að ráð fyrir afhendingu til Nova á fyrri hluta ársins 2027. Húsnæðið verður sérhannað með þarfir Nova í huga, og mun öll starfsemi félagsins, sem nú er í Lágmúla - skrifstofur, verslun og lager - flytjast í nýja húsnæðið,“ segir í tilkynningunni.

Samskipti við leigusala um leigulok núverandi húsnæðis í Lágmúla eru þegar hafin og segir í tilkynningunni að gert sé ráð fyrir að fjárhagsleg áhrif af flutningunum verði minniháttar.

Ekki hefur náðst í Björn Ásberg Árnason, framkvæmdastjóra Sam-félagsins sem rekur Sambíóin. 

Spennandi tímar framundan

Haft er eftir Sylvíu Kristínu í tilkynningunni að starfsmenn hlakki til að setja diskókúluna aftur upp í loft á Broadway þegar Nova flytji þangað 2027. 

„Broadway verður ekki bara nýtt heimilisfang heldur vinnustaður inn í framtíðina, með fullt af þeirri gleði, samvinnu og krafti sem árangur Nova hefur byggst á,“ er haft eftir Sylvíu Kristínu.

„Við ætlum að vera fyrst inn í framtíðina með snjallari lausnir á nýjum stað sem mótast af óskum og þörfum viðskiptavina og starfsfólks. Þannig verðum við áfram besta liðið, sterkasta vörumerkið, með ánægðustu viðskiptavinina og löðum um leið að okkur framúrskarandi hæfileikafólk sem virkjar gleðina og gróskuna sem hefur alltaf einkennt Nova.

Það eru spennandi tímar framundan, við ætlum okkur stóra hluti og þess vegna skiptir máli að allt Nova liðið sé hluti af vegferðinni og taki þátt í henni saman. Við kynntum kaupréttaráætlun fyrir allt starfsfólk Nova í gær. Nú hækkum við í græjunum og hlökkum til að stíga út á glænýtt dansgólf stærsta skemmtistaðar í heimi,“ segir Sylvía Kristín.

Fréttin hefur verið uppfærð.