Sýn tapaði 239 milljónum

Í yfirlýsingu vegna ársfjórðungsuppgjörs Sýnar segir að tekjusamdráttinn megi að mestu skýra með einskiptisáhrifum af yfirfærslu viðskiptavina í nýtt vöruframboð á haustmánuðum.

Það hafi haft neikvæð áhrif á tekjur af sjónvarpsáskriftum og heimatengingum um níutíu milljónir króna. Þar að auki hafi bókfærðar tekjur vegna fjölmiðlastyrks verið 124 milljónir á sama tímabili í fyrra en styrkurinn hafi ekki verið til staðar á þessu ári.

Á árinu hefur Sýn tapað 757 milljónum króna.

Áhugasamir geta séð frekari og tæknilegri upplýsingar hér.

Herdís Dröfn Fjelsted, forstjóri Sýnar, segir að þó fjórðungurinn hafi verið krefjandi sjáist nú merki um viðsnúning.

„Samningurinn við Nova um framsal 4G- og 5G-dreifikerfa til Sendafélagsins er lykilskref sem lækkar fjárfestingaþörf, bætir nýtingu innviða og styrkir sjóðstreymi.

Tekjur og EBIT hafa dregist saman á þriðja ársfjórðungi en EBITDAaL er í jafnvægi og rekstrargrundvöllurinn að styrkjast. Við höldum áfram að aðlaga okkur að breyttu rekstrarumhverfi með því að einfalda starfsemina, bæta þjónustu, nýta tækifæri og mæta áskorunum sem felast í hraðri tækniþróun og breyttum neysluvenjum. Samhliða er unnið að endurskoðun á rekstrarmódeli fjölmiðla.“

Vísir er í eigu Sýnar.