Of snemmt að segja hvort vaxtadómurinn geri lán dýrari eða ó­dýrari

Íslandsbanki tilkynnti í gær að einu lánin sem hann byði upp á yrðu óverðtryggð á föstum vöxtum. Það voru viðbrögð við nýlegum dómi Hæstaréttar sem dæmdi skilmála vaxta á breytilegum vöxtum hjá Íslandsbanka ólöglega. 

Landsbankinn og aðrar lánastofnanir hafa þegar tilkynnt um breytt framboð á lánum í kjölfar dómsins og í aðdraganda fleiri sambærilegra mála sem bíða Hæstaréttar.

Jón Guðni Ómarsson, bankastjóri Íslandsbanka,´sagði í kvöldfréttum Sýnar í gærkvöldi að bankinn stefndi að því að bjóða upp á breytilega vexti eins fljótt og auðið yrði. Sama ætti við um verðtryggð lán sem til stæði að bjóða öllum lántakendum, ekki bara fyrstu kaupendum eins og Landsbankinn tilkynnti um í síðustu viku.

„Ég á svona síður von á því að breytilegir verðtryggðir vextir komi aftur,“ sagði Jón Guðni.

Spurður að því hvort að vaxtadómurinn ætti eftir að gera lán dýrari eða ódýrari sagði Jón Guðni of snemmt að segja til um það. Vaxtaumhverfið réði mestu um það.

„Ég er bara bjartsýnn á það að við getum búið til góðar vörur þannig að þetta verði mjög skilvirkur markaður eftir sem áður,“ sagði bankastjórinn sem fullyrti að Íslandsbanki tæki hluta af kostnaðinum við vaxtadóminn á sig.

Aukinn áhugi á óverðtryggðu með fasta vexti

Skilmálar lána Íslandsbanka sem Hæstiréttur taldi ólöglega veitti bankanum nokkuð alltumlykandi svigrúm til þess að taka ákvarðanir um breytingar á vöxtum lána. Hæstiréttur sagði í dómi sínum að rétt væri að miða við stýrivexti Seðlabankans við vaxtaákvarðanir.

Stýrivextirnir eru nú 7,5 prósent. Jón Guðni sagði áhuga á óverðtryggðum fastvaxtalánum hafa aukist aðeins að undanförnu þegar hann var spurður hvort hann gerði ráð fyrir að nokkur hefði áhuga á að taka slíkt lán við núverandi aðstæður.

„Þetta eru lánin sem eru í boði núna fyrir þá sem eru að huga að húsnæðiskaupum akkúrat núna,“ sagði bankastjórinn sem boðaði að lánaframboðið ykist aftur á næstu vikum.

Voru komin með eigin lausn fyrir útspil ríkisstjórnar

Ríkisstjórnin kynnti í vikunni að ætlunin væri að bregðast við dómnum með því að birta svokallað vaxtaviðmið í samráði við Seðlabankann sem lánveitendur gætu notað til grundvallar verðtryggðum lánum. Viðmiðið byggði á vöxtum ríkisskuldabréfa.

Jón Guðni sagði Íslandsbanka hafa verið búinn að teikna upp sínar eigin lausnir varðandi verðtryggð lán. Hann þyrfti nokkra daga til þess að gera upp við sig hvort hann nýtti vaxtaviðmið stjórnvalda eða sína eigin lausn.