Fresta hrekkja­vöku til að tryggja öryggi lítilla skrímsla

Á Facebook má sjá að búið er að fresta hátíðinni bæði á höfuðborgarsvæði og á landsbyggð. Til dæmis er búið að fresta í Hlíðum, í Vesturbæ og miðborg, á Völlunum, Norðlingaholti, Kársnesi, Laugarneshverfi og á Hellu.

„Það komu umræður hvort það væri sniðugt út af veðri og aðstæðum, ekki búið að moka, að það verði erfitt fyrir lítil skrímsli og verur að labba um til að fá grikk eða gott. Þannig við ákváðum að skoða hvenær fólk myndi vilja flytja það,“ segir Saga Rúnarsdóttir, móðir og skipuleggjandi viðburðarins í Norðlingaholti.

Öryggisatriði að færa hátíðina

Hún segist hafa orðið smá stressuð en sé sátt við niðurstöðuna.

„Þetta var bara upp á öryggi fyrir krakkana og að geta haldið allri skemmtuninni í gangi.“

Og hver var niðurstaðan?

„Við ætlum að færa yfir á morgun, sama tíma, frá 17-19, sem við höfum gert síðustu ár.“

Á Facebook er hægt að finna viðburði fyrir Norðlingaholt, og flest önnur hverfi, þar sem einnig er hægt að finna kort sem fólk hefur merkt inn á hvort það sé í boði að banka upp á fyrir grikk eða gott.

„Það er venjulega mjög góð þátttaka, er oftast líka fyrir öskudag. Fólki finnst voðalega gaman að taka þátt í þessu og sjá búninginn hjá krökkunum og bara upplifa smá dægrastyttingu.“

Saga segir frestunina gott tækifæri fyrir krakka til að nýta búningana.

„Það er kannski betra að vera bara með tvo daga í búning heldur en einn,“ segir Alexandra sem sjálf stefnir á að vera í drekabúning og sonur hennar vera úr K Pop Demon Hunters.

Halda sínu striki í Haukahlíð

Sumir hafa þó ákveðið að halda sínu striki, eins og húsfélagið í Haukahlíð 1, stærsta húsfélag landsins. Óttar Völundarson er einn þeirra íbúa sem hafa skipulagt viðburð á Facebook fyrir húsfélagið í Haukahlíð 1 á Valsreitnum.

„Þetta er stærsta enn sem komið er stærsta húsfélag landsins,“ segir Óttar Völen blokkin er í kassa og í miðjunni er kassalaga garður. Í kassanum eru 191 íbúð.

Hann segir ríka hefð í blokkinni fyrir því að halda hrekkjavöku hátíðlega. Sérstök hrekkjavökunefnd sér um að skreyta garðinn.

„Það er einn inngangur í garðinn og þaðan er aðgengi að öllum íbúðum í gegnum mismunandi stigaganga,“ segir Óttar og að íbúar á jarðhæð hafi síðustu ár sérstaklega skreytt hjá sér.

„Í fyrra leigðum við ljós og hljóðkerfi. Það er gert dálítið úr þessu.“

Vegna veðurs sjá þau ekki fram á að geta skreytt með sama hætti í garðinum í ár og því verða skreytingar í ár götumegin í húsinu.

„Það er til að einfalda þeim sem eru að labba í hús að komast á milli. Í stað þess að skreyta garðinn verður einni hjólageymslunni breytt í hrekkjavökuhús. Fólk getur þannig fengið smá smjörþef af því sem áður var,“ segir Óttar og að allir séu velkomnir.

„Það jákvæða við þetta fyrirkomulag hjá okkur er auðvitað að þú kemst yfir rosalega mikið magn, á mjög marga staði, á mjög litlum bletti.“

Hér á Vísindavef Háskóla Íslands er hægt að kynna sér nánar um uppruna hátíðarinnar. 

Viðburðir í Ásmundasafni í Reykjavík og á Árbæjarsafni falla  niður.

„Nornir, afturgöngur og aðrar óvættir hafa afboðað komu sína á Árbæjarsafn nú á föstudaginn 31. október, þar sem þau eru veðurteppt í handanheimum. Því miður fellur hrekkjavaka því niður í ár,“ segir í tilkynningu frá safninu.