Niður­staða í máli Arion banka um miðjan desem­ber

Arion banki, Landsbankinn og minnst þrír lífeyrissjóðir hafa takmarkað afgreiðslu nýrra íbúðalána í kjölfar dóms Hæstaréttar þar sem ákveðnir lánaskilmálar Íslandsbanka voru dæmdir ólögmætir. 

Þeir skilmálar sneru að breytilegum vöktum óverðtryggðra lána og niðurstaðan var sú að óheimilt hafi verið að breyta þeim í takti við annað en stýrivexti Seðlabanka Íslands.

Málflutningur 17. nóvember

Þrjú önnur mál sem varða skilmála bankanna bíða afgreiðslu Hæstaréttar en það næsta á dagskrá réttarins er mál neytenda á hendur Arion banka. Á vef Hæstaréttar má sjá að málflutningur er á dagskrá þann 17. nóvember næstkomandi.

Samkvæmt lögum um meðferð einkamála skal kveða upp dóm eigi síðar en fjórum vikum eftir málflutning, ellegar skuli flytja mál á ný. Einkar óvanalegt er að Hæstiréttur fari umfram fjórar vikurnar og sömu sögu er af því að rétturinn kveði upp dóma innan fjögurra vikna.

Því má reikna með því að dómur verði kveðinn upp í málinu þann 15. desember næstkomandi.

Veitir betri mynd af stöðunni

Sem áður segir varðar málið skilmála verðtryggðs láns en lánið í máli neytenda á hendur Íslandsbanka var óverðtryggt.

Þar var niðurstaðan sú að ekki mætti miða breytingar vaxta við annað en breytingar á stýrivöxtum Seðlabankans. Enn er uppi óvissa um stöðu breytilegra vaxta verðtryggðra lána en ljóst má telja að þeir verði ekki bundnir stýrivöxtum. 

Því mun dómur Hæstaréttar, og hinir tveir dómarnir í kjölfarið, varpa frekara ljósi á það hvernig skilmálar í lánasamningum mega vera úr garði gerðir.

Bankinn vinnur að bráðabirgðalausn

Arion banki tilkynnti skömmu eftir uppkvaðningu dóms Hæstaréttar í málinu á hendur Íslandsbanka að hann hefði gert hlé á veitingu verðtryggðra lána.

Í tilkynningu Arion bnka þess efnis sagði að skilmálar íbúðalána bankans með breytilega vexti væru ólíkir þeim sem voru dæmdir ólögmætir í máli Íslandsbanka. Óháð því myndi dómstólinn síðar taka fyrir mál sem snúi að láni Arion banka með breytilegum verðtryggðum vöxtum. Landsréttur hefði dæmt bankanum í vil í febrúar en óvissa ríkti um lögmæti vaxtabreytingarskilmála verðtryggðra lána á meðan beðið er niðurstöðu Hæstaréttar í málinu gegn Arion.

Bankinn ætlar þrátt fyrir það ekki að sitja auðum fram að uppkvaðningu dóms Hæstaréttar í desember.

„Þegar kemur að verðtryggðum íbúðalánum þá erum við að leita leiða til að bjóða einhvers konar bráðabirgðalausn fyrir fasteignakaupendur þar til Hæstiréttur fellir sinn dóm í desember. Staðan er nokkuð snúin en vonir okkar standa til þess að þetta skýrist á næstu dögum frekar en vikum,“ segir Haraldur Guðni Eiðsson, forstöðumaður samskiptasviðs Arion banka, í svari við fyrirspurn Vísis.