Viðskipti innlent

Kampa­vínsklúbbar, inn­herja­svik og nú meint skatt­svik

Árni Sæberg skrifar
Kristján Georg í Héraðsdómi Reykjavíkur þegar innherjasvikamálið var þar til meðferðar.
Kristján Georg í Héraðsdómi Reykjavíkur þegar innherjasvikamálið var þar til meðferðar. Vísir/Vilhelm

Kristján Georg Jósteinsson, sem hlaut árið 2019 þriggja og hálfs árs fangelsisdóm fyrir innherjasvik hjá Icelandair, hefur verið ákærður fyrir meiri háttar skattalagabrot. Hann er sakaður um að hafa ekki talið fram úttektir úr einkahlutafélögum, sem hann nýtti meðal annars við framkvæmd innherjasvikanna og rekstur kampavínsklúbbanna VIP club og Shooters í Austurstræti.

Í ákæru Héraðssaksóknara á hendur Kristjáni Georg segir að hann hafi staðið skil á efnislega röngum skattframtölum gjaldárin 2015 til og með 2018, vegna tekjuráranna 2014 til og með 2017, með því að hafa látið undir höfuð leggjast að telja annars vegar fram úttektir úr rekstri KFK ehf., Fastrek ehf. og Neostar 75 76 SL, að fjárhæð samtals 54 milljóna króna og hins vegar með því að vanframtelja 33 milljónir króna sem bárust inn á reikning hans.

Þess er krafist að Kristján Georg verði dæmdur til refsingar og greiðslu alls sakarkostnaðar auk upptöku á fjármunum, sem haldlagðir voru af Héraðssaksóknara árið 2019.

Græddu 61 milljón á innherjasvikum

Sem áður segir hlaut Kristján Georg Þriggja og hálfs árs fangelsi fyrir innherjasvik hjá Icelandair árið 2019. Annar maður var dæmdur til átján mánaða fangelsis í málinu og sá þriðji hlaut skilorðsbundinn dóm, auk þess sem 52 milljónir króna voru gerðar upptækar. Í Landsrétti var refsing Kristjáns Georgs staðfest, refsing annars mannsins þyngd um tvo mánuðu og þriðji maðurinn sýknaður.

Mennirnir þrír voru ákærðir fyrir innherjasvik eða hlutdeild í slíku broti á árunum 2015 til 2017. Talið var að þeir hefðu notfært sér upplýsingar frá einum þeirra, sem hafði stöðu fruminnherja, í viðskiptum með hlutabréf í Icelandair og hagnast um rúmlega 61 milljón króna með gjörningnum.

Hefur rekið kampavínsklúbba og spilavíti

Kristján Georg er fyrrverandi eigandi félagsins Fastreks, sem hét áður VIP Travel en viðskiptin með hlutabréfin í innherjasvikinum voru gerð í nafni félagsins. VIP Travel var eitt sinn tengt kampavínsklúbbnum VIP Club í Austurstræti þar sem samskonar klúbbur var síðar rekinn undir heitinu Shooters. Þar var Kristján Georg rekstrarstjóri. Greiðslur til VIP Club fóru í gegnum félagið VIP Travel.

Kristján hafði rekið kampavínsklúbba í umræddu húsi í Austurstræti 12 í lengri tíma en þeir hétu ýmsum nöfnum. Þá rak hann spilavítið Poker and Play í Skeifunni á árunum 2010 til 2012 en hann hlaut átján mánaða dóm fyrir þann rekstur í Hæstarétti árið 2016.

Skattar og tollar Dómsmál Icelandair Efnahagsbrot

Tengdar fréttir

Innherjasvik í Icelandair: „Ef það lítur út eins og önd...“

Að sögn saksóknara byggði sönnunarfærsla í svona málum því oftar en ekki á óbeinni sönnun, sem telst þó fullgild sönnun samkvæmt íslenskum lögum. Ef það lítur út eins og önd, labbar eins og önd og kvakar eins og önd – þá er það líklega önd, eins og Finnur komst að orði.

Innherjasvik í Icelandair: Segir sekt Kjarra Sambó alls ekki blasa við

Ákæran á hendur Kjartani Bergi Jónssyni er svo furðuleg að það hvarflaði að honum að fara fram á frávísun málsins, að sögn Gríms Sigurðarsonar verjanda hans. Kjartan Bergur hafi þó að endingu viljað fara fram á að vera sýknaður, í eitt skipti fyrir öll.

Þynging og sýkna í innherjasvikamáli í Icelandair

Landsréttur staðfesti í dag þriggja og hálfs árs fangelsisdóm yfir Kristjáni Georg Jósteinssyni í Icelandair-innhverjasvikamálinu. Þá var dómur yfir Kjartani Jónssyni þyngdur úr átján mánuðum í tvö ár. Kjartan Bergur Jónsson, sem fékk fjögurra mánaða skilorðsbundinn dóm í héraði, var sýknaður í Landsrétti.



Mest lesið


Fleiri fréttir

Sjá meira


×

Mest lesið