Origo kaupir Kappa

Í fréttatilkynningu þess efnis segir að Kappi ehf. hafi verið stofnað af Gunnari Þór Gestssyni, sem hafi um árabil hlotið viðurkenninguna Microsoft MVP í Business Central. Gunnar hafi unnið að flóknum innleiðingarverkefnum fjárhagskerfa fyrir mörg af stærstu fyrirtækjum landsins og öðlast víðtæka reynslu og traust á sínu sviði.

Með kaupunum bæti Origo við sig öflugu teymi Microsoft sérfræðinga Kappa og dýpki hæfni félagsins til að veita viðskiptavinum sínum markvissa ráðgjöf og þjónustu þegar kemur að innleiðingu fjárhagskerfa.

„Með þessum kaupum stígum við markvisst skref í þá átt að verða leiðandi Microsoft-ráðgjafi á íslenskum markaði en við tókum ákvörðun fyrir um ári að beina sjónum okkar alfarið að lausnamengi Microsoft í kjölfar sölu á SAP bankalausnum. Gunnar er einn reyndasti Microsoft sérfræðingur landsins og við sjáum veruleg tækifæri fyrir fyrirtæki til að nýta sér bæði Business Central í skýinu og þá öflugu verkfærakistu sem Microsoft hefur upp á að bjóða. Við erum afar spennt fyrir samstarfinu og því sem fram undan er,“ er haft eftir Ara Daníelssyni, forstjóri Origo.

„Ég er mjög spenntur fyrir þeirri vegferð sem Origo er á. Ég tel mikil tækifæri fyrir viðskiptavini mína að Kappi og Origo sameini krafta sína og geti veitt enn breiðari þjónustu og ráðgjöf. Ég hlakka til að vinna með og byggja upp Microsoft skýjalausna hóp Origo og halda áfram að veita viðskiptavinum Kappa og Origo framúrskarandi þjónustu,“ er haft eftir Gunnari Þór, stofnanda Kappa ehf.