Búið að greiða laun og barna­bætur

Þetta kemur fram í tilkynningu frá Reikningsstofu bankanna. Á þetta meðal annars við um laun og barnabætur.

„Það eru mánaðamót og töluvert álag á kerfin akkúrat þessa stundina. Vegna álags hefur orðið hægagangur á þessum vinnslum. Akkúrat núna eru launavinnslur keyrðar og komnar inn á reikninga launþega hins opinbera en barnabótum seinkar,“ sagði Sigurður Örn Hallgrímsson, forstöðumaður Reiknistofu bankanna, í samtali við fréttastofu fyrr í dag. 

Hann segir ekki um neina árás að ræða heldur sé um töluvert álag að ræða vegna þess fjölda sem fær laun og þess fjölda sem fær barnabætur. Tugir þúsunda fái laun frá hinu opinbera og um 65 þúsund auk þess barnabætur.

Barnabætur séu venjulega greiddar að nóttu til en muni í þetta skiptið skila sér síðar í dag.

„Við biðjumst auðvitað velvirðingar á þeim óþægindum sem þessi seinkun kann að valda,“ segir Sigurður Örn að lokum.

Uppfært kl 11.14: 

Seinkunum á greiðslum í kerfum Reiknistofu bankanna er nú lokið og hafa því allar greiðslur frá Tryggingastofnun og Fjársýslu ríkisins sem áttu að greiðast snemma í morgun skilað sér.

Beðist er velvirðingar á þeim óþægindum sem þessi seinkun kann að hafa valdið.