Heima­völlur Aftur­eldingar kenndur við raf­mynta­fyrir­tæki

Fimm fulltrúar í bæjarráði samþykktu erindi Aftureldingar um að fá að merkja íþróttahúsið að Varmá með nafni rafmyntafyrirtækisins frá og með haustinu og næstu þrjú keppnistímabilin á fundi sínum í gær.

Félagið fékk leyfi frá bænum til að selja nafn á íþróttamannvirkjum árið 2019 með skilyrði um að bæjarráð samþykkti nafnið. Knattspyrnuvöllur félagsins hefur verið kenndur við fyrirtækin Fagverk og Malbiksstöðina undanfarin ár.

Í erindi sínu vísaði Einar Ingi Hrafnsson, framkvæmdastjóri félagsins, til þess að rekstrargrundvöllur íþróttafélaga væri að stærstum hluta byggður á sterkum samstarfsaðilum. Saminingar af þessari stærð við Myntkaup væru sjaldgæfir.

Arnar Jónsson, sviðsstjóri menningar-, íþrótta- og lýðheilsusviðs Mosfellsbæjar, skilaði bæjarráði umsögn um nafnkaupin. Vísaði hann til fordæma hjá bænum og öðrum sveitarfélögum þegar hann lagði til að erindið yrði samþykkt.

„Myntkaup hefur sýnt vilja til að styðja við starfsemi handknattleiksdeildar UMFA með því að tengja sitt nafn við keppnishöllina. Slík samvinna er mikilvægt framlag til fjárhagslegs öryggis og styrkir bæði rekstur og ímynd deildarinnar,“ sagði umsögn hans.

Seðlabankastjóri er á meðal þeirra sem hafa lýst efasemdum um ágæti rafmynta eins og Bitcoin sem Myntkaup auglýsa meðal annars á vefsíðu sinni. Líkti hann viðskiptum með rafmyntir við pýramídasvindl árið 2021. Gylfi Magnússon, prófessor í viðskiptafræði og fyrrverandi efnahags- og viðskiptaráðherra, hefur einnig sagt að þau séu fyrst og fremst spákaupmennska.

Fordæmi eru fyrir því erlendis að rafmyntafyrirtæki kaupi nafnarétt á íþróttaleikvöngum. Þannig var heimavöllur bandaríska körfuknattleiksliðsins Miami Heat kenndur við rafmyntakauphöllina FTX áður en fyrirtækið hrundi í skugga áskana um milljarða misferli stjórnenda. Stofnandi fyrirtækisins var dæmdur í 25 ára fangelsi fyrir fjársvik og peningaþvætti í fyrra.