Skaut guð­föður sinn í augað og gæti misst leyfið

Heikkinen, sem er 21 árs gamall, fullyrðir að um slys hafi verið að ræða og að guðfaðir hans hafi í aðdraganda skotsins farið út af leiðinni sem þeir höfðu ákveðið.

Guðfaðirinn missti sjón á öðru auganu. Hann mun hafa verið í 55 metra fjarlægð þegar Heikkinen skaut af haglabyssu sinni.

Samkvæmt ákærunni er farið fram á að Heikkinen greiði 80 daga sekt (upphæðin fer eftir tekjum Heikkinen) og fer guðfaðirinn auk þess fram á jafnvirði 3,3 milljóna íslenskra króna í skaðabætur.

Dæmt verður í málinu eftir tvær vikur og ef Heikkinen verður dæmdur sekur þá missir hann skotvopnaleyfi sitt.

Mögulega settur í bann

Málið gæti einnig haft grafalvarleg áhrif á feril Heikkinen þó að sérfræðingur finnska ríkismiðilsins Yle, Ville Kotikumpu, segi að hann muni áfram geta æft og keppt undir umsjón aðila með byssuleyfi. Það velti þó á túlkun alþjóða skíðaskotfimisambandsins á reglunum.

Heikkinen sendi frá sér yfirlýsingu á Instagram vegna málsins og sagði þar:

„Lífið er óútreiknanlegt. Á löglegum veiðum síðasta haust slasaðist guðfaðir minn alvarlega fyrir slysni. Síðastliðið ár hefur verið gríðarlega erfitt andlega fyrir mig og mína nánustu, og sér í lagi hefur líðan guðföður míns valdið mér áhyggjum.“

Hann bætti við að lífið héldi áfram og að fátt annað væri í stöðunni en að vonast eftir bjartari framtíð.

Heikkinen vann gullverðlaun og tvenn bronsverðlaun á HM ungmenna í skíðaskotfimi árið 2022 og var í A-landsliði Finna á HM í Lenzerheide síðasta vetur.