Brást boga­listin fyrir framan pabba sinn

Tiger Woods var mættur á svæðið til að horfa á soninn en strákurinn brást bogalistin fyrir framan pabba sinn. 

Woods lék fyrstu tvo hringina á 155 höggum eða fjórtán höggum yfir pari. Hann var í 216. sæti af 264 keppendum.

Það var einkum fyrsti hringurinn sem fór með hann því Charlie lék á 81 höggi eða ellefu höggum yfir pari. Hann bætti sig um sjö högg á öðrum degi en það var ekki nóg.

Þetta er annað árið í röð sem hann kemst ekki í gegnum niðurskurðinn á þessu árlega móti.

Það að hann hafi verið tíu höggum frá því að ná niðurskurðinum hljóta hins vegar að vera mikil vonbrigði.

Charlie Woods hafði unnið Team TaylorMade Invitational mótið á Flórída í maí. Hann spilaði þá lokahringinn á 66 höggum og vann með þremur höggum.

Það lofaði góðu fyrir framhaldið en það virðist ætla að vera bið á því að Charlie komi sér í hóp bestu kylfinga á sínum aldri. Faðir hans var undrabarn en Charlie hefur enn góðan tíma til að bæta sinn leik enda enn bara sextán ára gamall.

Veigar einu höggi frá því

Íslendingurinn Veigar Heiðarsson tók líka þátt í mótinu en hann náði ekki niðurskurðinum. Hann spilaði þó mun betur en Charlie eða á 145 höggum samtals eða fjórum höggum yfir pari. Það munaði grátlega litlu að Veigar kæmist áfram því hann var aðeins einu höggi frá því.