Ást­hildur Helga: Þetta var bara lé­legt

Íslenska liðið tapaði 1-0 á móti Finnlandi í gærkvöldi, liði sem var fyrir fram álitið vera slakasta liðið í íslenska riðlinum.

Landsliðsþjálfarinn Þorsteinn Halldórsson var kannski sáttur með spilamennskuna en ekki þær Þóra og Ásthildur. Flestir eru líka sammála því að íslenska liðið átti ekki sinn besta dag og lék auk þess tíu á móti ellefu síðustu þrjátíu mínútur leiksins.

„Þetta var sárt að tapa fyrsta leik,“ sagði Stefán Árni.

Þetta var verulega sárt

„Já og hvernig hann tapaðist. Væntingarnar voru miklar hjá öllum í kringum þetta og þetta var verulega sárt,“ sagði Þóra.

„Þetta var bara lélegt, einu orði sagt. Við töluðum um það fyrir leikinn að það yrði gríðarlega mikilvægt að vinna þennan fyrsta leik. Á móti þessu liði í þessum leik sem var leikurinn sem við áttum að vinna. Þetta var bara ekki nógu góð frammistaða,“ sagði Ásthildur.

„Frá fyrstu mínútu þá var bara finnska liðið betra en við. Betur skipulagt, áræðnari og einfaldlega töluvert betri,“ sagði Þóra.

Fannst þetta vera hálfgerð óreiða

Þóra taldi það svo sem alveg eðlilegt að það væri smá stress í leikmönnum íslenska liðsins fyrstu tíu mínúturnar. „En svo komust þær bara ekkert yfir það,“ sagði Þóra.

„Ég átti mjög erfitt að sjá planið í dag. Ég sá að Ingibjörg [Sigurðardóttir] kom í viðtal eftir leik og sagði þrisvar að þær hefðu verið með plan. Ég gat ekki séð það og kalla eiginlega bara eftir því. Mér fannst þetta vera hálfgerð óreiða,“ sagði Þóra.

Það er hægt að hlusta á allan þáttinn hér fyrir neðan.