„Stóra og fal­lega“ frum­varp repúblikana á tæpasta vaði

Atkvæðagreiðslur um aragrúa breytingatillagna við frumvarpið sem gengur undir heitinu „Eitt stórt fallegt frumvarp“ fara fram í öldungadeild Bandaríkjaþings í dag. Það felur í sér stórfelldan niðurskurð á útgjöldum alríkisstjórnarinnar og billjóna dollara skattalækkanir að tillögu Bandaríkjaforseta.

Fjárlagaskrifstofa Bandaríkjaþings áætlar að frumvarpið auki fjárlagahalla ríkisins um 3,3 billjónir dollara á þessum áratug. Niðurskurður til heilbrigðismála leiði til þess að hátt í tólf milljónir landsmanna til viðbótar verði án sjúkratrygginga en ella árið 2034.

Þrátt fyrir að repúblikanar fari með meirihluta í öldungadeildinni eru örlög frumvarpsins óljós. Forysta Repúblikanaflokksins þurfti að tjalda töluverðu til að fá nægilega marga þingmenn sína til þess að greiða atkvæði með því að frumvarpið yrði tekið til efnismeðferðar um helgina.

Bæði harðlínumenn og hófsamari repúblikanar eru ósáttir við hluta frumvarpsins og gætu komið í veg fyrir að það nái fram að ganga. Harðlínumenn telja ekki nógu langt gengið í að draga úr ríkisútgjöldum með frumvarpinu en hófsamari repúblikanar óttast að svo blóðugur niðurskurður í heilbrigðiskerfinu eigi eftir að koma niður á flokknum kosningum.

Bandaríkjaforseti hefur gefið flokksbræðrum sínum frest til þjóðhátíðardagsins 4. júlí að samþykkja frumvarpið.

Sviku kosningaloforð forsetans

Repúblikanar hafa þegar orðið fyrir blóðtöku við að reyna að koma frumvarpinu í gegn. Thom Tillis, öldungadeildarþingmaður flokksins frá Norður-Karólínu, tilkynnti að hann ætlaði ekki að sækjast eftir endurkjöri á næsta ári eftir að forsetinn veittist að honum á samfélagsmiðlum fyrir að styðja ekki frumvarpið.

Tillis hélt reiðilestur yfir flokkssystkinum sínum í þingsal í gær þegar hann gagnrýndi fyrirhugaðan niðurskurð á Medicaid, opinberu heilbrigðiskerfi fyrir tekjulægri einstaklinga. Yrði frumvarpið að lögum sviku repúblikanar kosningaloforð forsetans um að hann ætlaði sér ekki að svipta fólk sjúkratryggingum sínum.

„Við gætum tekið okkur tíma í að gera þetta rétt,“ sagði Tillis við samherja sína.

Brotthvarf Tillis úr kosningunum á næsta ári er talið auka líkurnar á því að demókratar gætu stolið því af repúblikönum verulega.

Ef bæði Tillis og Rand Paul, þingmaður repúblikana frá Kentucky, greiða atkvæði gegn frumvarpinu eins og líklegt er talið mega repúblikanar aðeins við því að einn þingmaður til viðbótar hlaupist undan merkjum.

Skera niður græna orku og vísindi en aukið fé í brottvísanir

Fleira er umdeilt í frumvarpinu. Bæði Viðskiptaráð Bandaríkjanna og hagsmunasamtök sólarorkuiðnaðarins hafa gagnrýnt harðlega ákvæði frumvarpsins um skatta á vind- og sólarorkuver sem bætast ofan á niðurskurði á ívilnunum til endurnýjanlegrar orkuframleiðslu.

Elon Musk, fyrrverandi bandamaður forsetans og ríkasti maður í heimi, kallaði frumvarpið „algerlega sturlað og skaðlegt“. Niðurgreiðslur á úreltum iðnaði samhliða skaðlegum aðgerðum fyrir iðnað framtíðarinnar ætti eftir að kosta milljónir starfa í Bandaríkjunum.

Þá færði frumvarpið Innflytjenda- og tollaeftirliti Bandaríkjanna (ICE) stórauknar fjárheimildir upp á hundruð milljarða dollara til þess að framfylgja stefnu forsetans um fjöldabrottvísanir útlendinga. Útsendarar stofnunarinnar hafa farið um grímuklæddir og óauðkenndir og numið fólk á brott af götum úti.

Gríðarlegan niðurskurð í öllu vísindastarfi, hvort sem það er í heilbrigðisvísindum eða hjá geimferðastofnuninni NASA, er einnig að finna í stóra frumvarpinu sem telur hátt í þúsund blaðsíður.

Allir þingmenn demókrata ætla að greiða atkvæði gegn frumvarpinu en þeir hafa meðal annars kallað það ábyrgðarlaust og hættulegt.