Kattholt yfir­fullt

„Athvarfið okkar er nú yfirfullt af heimilislausum kisum og við leitum því til ykkar,“ stendur í færslu á Facebook-síðu Kattaathvarfsins.

Þar segir að allur kattamatur, sandur og vel með farnir klórstaurar komi að notum hjá athvarfinu.

Áður hefur verið fjallað um erfiða stöðu í athvarfinu sem fyllist óðum. Um mitt síðasta sumar hafi verið um tvö hundruð kettir í athvarfinu.

„Fólk er að fara í sumarfrí, eða flytja eða komið upp ofnæmi á heimilinu eða eitthvað slíkt. Á meðan fólk er í sumarfríum er enginn að ætleiða, þannig er bara venjan,“ sagði Hanna Evensen, rekstrarstjóri Kattholts í viðtali sumarið 2024.

Kattavinafélagið hóf störf árið 1976 og tók Svanlaug, formaður félagsins, að sér heimilislausa ketti og veitti þeim húsaskjól.