Lagt hald á fíkni­efni og búnað til fram­leiðslu

Fimm hafa verið úrskurðaðir í vikulangt gæsluvarðhald á grundvelli rannsóknarhagsmuna vegna málsins. Um er að ræða fullorðið fólk en lögregla veitir hvorki upplýsingar um aldur þeirra né þjóðerni.

Ráðist var í umfangsmiklar aðgerðir á nokkrum stöðum á landinu á miðvikudag, meðal annars á Raufarhöfn og í Borgarnesi. Rannsóknin beinist að skipulagðri brotastarfsemi og fíkniefnaframleiðslu og naut lögreglan á Norðurlandi eystra liðsinnis lögregluembætta á Vesturlandi og á höfuðborgarsvæðinu auk sérsveitar Ríkislögreglustjóra.

Skarphéðinn Aðalsteinsson, aðstoðaryfirlögregluþjónn og yfirmaður rannsóknardeildar hjá lögreglunni á Norðurlandi eystra, staðfestir að lagt hafi verið hald á muni, efni til fíkniefnaframleiðslu og fíkniefni en vill þó ekki gefa upp hvers konar efni. 

Hann segir rannsóknina umfangsmikla og enn yfirstandandi. Mögulegt sé að ráðist verði í frekari húsleitir og handtökur. 

Lögregla hefur haldið spilunum þétt að sér og í samtali við fréttastofu í gær sögðust íbúar á Raufarhöfn furðu lostnir eftir að sérsveit réðst í húsleit þar í bæ.