Sjáðu þáttinn um TM-mótið: Stuðhundur, afi þjálfari og flottar fléttur

Íþróttafréttakonan og Eyjamærin Svava Kristín Grétarsdóttir tók eldhressa gesti tali í Eyjum og afraksturinn má sjá í spilaranum hér að neðan.

Mótið var haldið í 36. sinn og á því voru tæplega þúsund keppendur úr 33 félagsliðum, með gleðina að vopni.

Á meðal gesta var einnig fjöldinn allur af stuðningsfólki stelpnanna og einnig vægast sagt fjörugur stuðningshundur Víkinga.

„Það er svo gaman að fá alla þessa frábæru keppendur á mótið. Allar með bros á vör. Það hefur bara verið þannig að það skiptir ekki máli hvernig veðrið er, stelpurnar mæta alltaf og gera sitt, sama hvernig viðrar. Þær eru blessunarlega í góðu veðri núna. Þetta eru yfirleitt bara foreldrarnir sem að væla eitthvað, ekki stelpurnar,“ sagði Ellert Scheving, framkvæmdastjóri ÍBV, en segja má að veðrið hafi að mestu leikið við gesti alla helgina.

Það voru FH-stelpur sem stóðu uppi sem sigurvegarar á mótinu.