Ó­sáttur Lárus Orri: „Sýnum smá ást­ríðu líka“

„Þú talar um fyrir auglýsingahléið að það hafi verið hiti í leiknum, að þetta hafi ekki verið eins og æfingaleikur. Það var hiti í öðru liðinu, það voru Norður-Írar sem voru með smá ástríðu í lokin,“ sagði Lárus Orri og hélt áfram.

„Sjáum þá hoppa í eina flotta tæklingu, hver eru viðbrögðin okkar? Ýta manninum aðeins. Koma svo tökum þátt í leiknum, svörum bara með góðri tæklingu á móti. Sýnum smá ástríðu líka.“

„Það var aldrei spurning eftir að þessi leikmaður var rekinn út af að Norður-Írar væru að fara vinna þennan leik, þeir virkilega vildu það. Við vorum svona að reyna. Það kom smá kafli í seinni hálfleik þar sem við vorum að finna Albert (Guðmundsson) og vorum að finna leikmenn í holunni. Maður hélt að þetta væri að þróast í rétta átt hjá okkur.“

„Ég myndi segja að allur leikurinn og hugarfarið væru vonbrigði. Ég horfi á leikmenn eins og Arnór Ingva (Traustason) og Willum (Þór Willumsson). Þetta eru strákar sem eru að fá gluggann til að sýna sig, þá eiga þeir að koma inn með ástríðu og sýna heldur betur að þeir eigi heima þarna. Logi (Tómasson) líka, þetta eru ekki leikmenn sem nýttu tækifærin sín vel.“