Á­hyggju­fullir eftir tap gegn „algjöru meðalliði“ Ís­lands

Íslenska karlalandsliðið í knattspyrnu vann sterkan 1-3 sigur er liðið heimsótti Skota í vináttulandsleik á Hampden Park í gær. Andri Lucas Guðjohnsen og Guðlaugur Victor Pálsson skoruðu fyrir íslenska liðið, ásamt því að Skotinn Lewis Ferguson varð fyrir því óláni að setja boltann í eigið net.

Eftir sigur Íslands hafa skoskir sparkspekingar spurt mjög svo einfaldrar spurningar: „Hvað næst?“

Með spurningunni er verið að vísa í stjóratíð Steve Clarke með liðið. Undir hans stjórn hafa Skotar komist á tvö stórmót, en samkvæmt Scott Mullen hjá BBC hringdi tapið í gær ansi mörgum viðvörunarbjöllum. Hann segir skoska liðið sem hann sá á EM á síðasta ári hvergi hafa verið sjáanlegt gegn Íslendingum.

„Sléttu ári eftir síðustu undankeppni er sama tilfinning komin upp aftur,“ ritar Mullen. „Gegn algjöru miðlungsliði Íslands var skoska liðið hógvært, veikburða og dapurt.“

„Skoska liðið sem sýndi tennurnar og blóðgaði Spánverja var hvergi sjáanlegt. Það var ekki einu sinni þefur af liðinu sem kýldi frá sér gegn Króötum og Pólverjum með nokkurra daga millibili á síðasta ári.“