Krimmi Elizu Reid á toppnum annan mánuðinn í röð

„Þetta er frábær árangur. Hún er í fyrsta sæti listans annan mánuðinn í röð. Og við sendum henni hamingjuóskir með velgengnina,“ segir Bryndís Loftsdóttir framkvæmdastjóri Fíbút.

Athyglisvert má heitaað þetta líklega fjórði krimminn sem nýtir Vestmannaeyjar sem sögusvið. Sá fyrsti var Aska (2008) eftir Yrsu Sigurðardóttur, næst kom Skaði (2021) eftir Sólveigu Pálsdóttur og svo var Yrsa aftur stödd í Vestmannaeyjum í Gættu þinna handa (2022). Þar með er ekki öll sagan sögð því á síðasta ári fóru fram tökur á nýrri glæpaþáttaröð, Friðarhöfn í Vestmannaeyjum og Blink49Studio hefur nýlega tryggt sér réttinn til að vinna kvikmyndahandrit upp úr Diplómati deyr.

„Hvers vegna líkin hrannast upp í Vestmannaeyjum verða höfundarnir líklega sjálfir að svara,“ segir Bryndís.

Framkvæmdastjóri Fíbút skimar yfir listann og vill nefna að í þrettánda sæti situr bókin Gæfuspor – gildin í lífinu eftir heimspekinginn Gunnar Hersvein.

„Þegar þessi ágæta bók kom fyrst út fyrir tuttugu árum, árið 2005, voru aðrir titlar fyrirferðameiri á fermingar- og útskriftargjafabókamarkaðnum svo sem eins og ljóðasöfn Steins Steinars og Tómasar, Sjálfstætt fólk, Bókin um veginn og Passíusálmarnir. En þessi litla gildishlaðna gæfusporabók hans Gunnars Hersveins hefur á hljóðlegan hátt hafið sig á loft og er fyrir löngu orðin eina allra vinsælasta útskriftargjöfin á markaðnum. Þetta er sígild gjafabók og mættu þær gjarnan sjást fleiri á listanum.“

Bóksölulistinn er annars fjölbreyttur og endurspeglar þá líflegu kiljuútgáfu sem jafnan ræður ríkjum á þessum árstíma. Þar má finna sex skáldverk og sex glæpasögur auk fjögurra fræðibóka, tveggja ástarsagna og tveggja barnabóka.

„Það ættu allir að láta það eftir sér að lesa eina góða bók í sumar,“ segir Bryndís óþreytandi að halda á lofti því að fátt jafnist á við lestur góðrar bókar.

Bóksölulistinn maí 2025

1. Diplómati deyr - Eliza Reid, þýð. Magnea J. Matthíasdóttir

2. Seint og um síðir - Claire Keegan, þýð. Helga Soffía Einarsdóttir

3. Franska sveitabýlið - Jo Thomas, þýð. Herdís M. Hübner

4. Mýrarljós - Viveca Sten, þýð. Elín Guðmundsdóttir

5. Aldrei, Aldrei - Colleen Hoover, þýð. Birgitta Elín Hassell og Marta Hlín Magnadóttir

6. Bara vinir - Abby Jimenez, þýð. Ingibjörg Valsdóttir

7. Hefnd Diddu Morthens - Sigríður Pétursdóttir

8. Handbók fyrir ofurhetjur 10 : Allir ljúga - Elias & Agnes Vahlun, þýð. Ingunn Snædal

9. Týr - Julia Donaldson, þýð. Sigríður Ásta Árnadóttir

10. Fiðrildaherbergið - Lucinda Riley, þýð. Valgerður Bjarnadóttir

11. Við höfum alltaf átt heima í kastalanum - Shirley Jackson, þýð. Gunnhildur Jónatansdóttir

12. Kúbudeilan 1962 - Max Hastings, þýð. Magnús Þór Hafsteinsson

13. Gæfuspor - Gildin í lífinu ný - Gunnar Hersveinn

14. Útvörðurinn - Lee & Andrew Child, þýð. Jón Hallur Stefánsson

15. Strákurinn sem las Jules Verne - Almudena Grandes, þýð. Kristín Guðrún Jónsdóttir

16. Bíll og bakpoki - Páll Ásgeir Ásgeirsson

17. Dúkkuverksmiðjan - Júlía Margrét Einarsdóttir

18. Bylur - Íris Ösp Ingjaldsdóttir

19. Gerum samning : jákvæðar leiðir til að hafa áhrif á hegðun barna - Jill C. Dardig og William L. Heward

20. Morð og messufall - Arndís Þórarinsdóttir og Hulda Sigrún Bjarnadóttir