Júlíus meiddur og Tómas tekinn inn í landsliðshópinn

Júlíus Mar, sem á að baki einn landsleik fyrir u21 og þrjá landsleiki fyrir u19, hefur glímt við lærismeiðsli á tímabilinu. Hann missti af fyrstu tveimur deildarleikjunum, fór síðan meiddur af velli í hálfleik gegn Aftureldingu í sjöundu umferð og var utan leikmannahópsins gegn Fram í síðustu umferð.

Júlíus stefnir á að vera klár í slaginn eftir landsleikjahlé, en mun ekki taka þátt í leik KR gegn Vestra næsta sunnudag eða í landsleikjunum tveimur sem framundan eru gegn Egyptalandi og Kólumbíu. Báðir leikir fara fram í Kaíró í Egyptalandi, 6. og 9. júní næstkomandi.

Landsliðsþjálfarinn Ólafur Ingi Skúlason hefur kallað Tómas Orra Róbertsson, miðvörð FH, inn í hópinn í hans stað. Um verður að ræða fyrstu landsleiki á ferli Tómasar.

Tómas hefur verið lykilmaður í liði FH en hann kom til félagsins frá Breiðablik eftir að hafa verið að láni hjá Grindavík og Gróttu í Lengjudeildinni síðastliðin tvö tímabil.

Tómas hefur byrjað alla átta deildarleiki tímabilsins í miðri vörn FH og skorað eitt mark, gegn ÍA í þarsíðustu umferð. Markið má sjá í spilaranum hér fyrir neðan.