Finnur fyrir miklum létti: „Al­gjört and­legt rugl“

„Þessu fylgir bara ólýsan­leg til­finning,“ segir Baldur er hann sest niður með frétta­manni degi eftir að Stjarnan tryggði sér sinn fyrsta Ís­lands­meistara­titil eftir sigur gegn Tindastól í odda­leik úr­slita­ein­vígis Bónus deildarinnar. „Ég finn fyrir miklum létti gagn­vart því að þetta sé búið og hafi endað svona. Gleði, ánægður með alla sem koma að þessu.“

Þetta var fyrsta tíma­bil Stjörnunnar undir stjórn Baldurs sem tók við liðinu af Arnari Guðjóns­syni eftir að hafa verið á mála hjá Ratiop­harm Ulm í Þýska­landi árin áður. Baldur stefndi strax að titli með lið Stjörnunnar en það er hægara sagt en gert að láta þá sýn raun­gerast.

„Þetta er ekki auðvelt, að vinna titil. Ég held að það sé öllum alveg ljóst sem hafa tekið þátt í þessu. Við Ægir Þór höfum verið í þessu yfir langan tíma en þetta er okkar fyrsti Ís­lands­meistara­titill, það er gaman að upp­lifa það. Maður er eigin­lega bara smá orð­laus yfir öllu. ÍR serían var erfið, Grinda­víkur serían enn þá erfiðari. Þetta eru svo mikil gæði sem þú ert að spila á móti, hrika­lega erfitt og bara geggjað að hafa náð svona erfiðu tak­marki.“

Baldur hefur á sínum þjálfara­ferli lengi verið á höttunum eftir Ís­lands­meistara­titli, hann hefur verið grá­lega nálægt því en einnig horft á eftir­menn sína í starfi ná því tak­marki.

„Fyrir mig er þetta persónu­lega stórt. Ég var grát­lega nálægt því að sækja Ís­lands­meistara­titil með Tindastól árið 2022, fer þaðan út í at­vinnu­mennsku og horfi á þá vinna titilinn árið eftir. Ég er upp­alinn í Þor­láks­höfn, var þjálfari liðsins á einum tíma­punkti, fer þaðan og horfi á þá taka titil. Það var erfitt í bæði skiptin en auðvitað sam­g­leðst maður þeim sem að tókst að gera þetta. En auðvitað var maður meðvitaður um þetta í baráttunni. Manni langaði þetta alveg rosa­lega mikið. Þetta er ákveðinn léttir, að hafa náð að gera þetta.“