Leik­maður Palace vann tvær og hálfa milljón á skákmóti

Síðustu dagar hafa verið gjöfulir fyrir Eze. Um síðustu helgi skoraði hann í 3-0 sigri Crystal Palace á Aston Villa í undanúrslitum ensku bikarkeppninnar.

Skömmu síðar vann hann svo sigur á skákmóti á netinu þar sem tólf samfélagsmiðlastjörnur og íþróttamenn leiddu saman hesta sína.

Fyrir sigurinn á mótinu, sem stóð yfir í fjóra daga, fékk Eze fimmtán þúsund pund, eða rúmlega 2,5 milljón íslenskra króna.

Eze smitaðist af skákáhuganum eftir að Michael Olise, fyrrverandi samherji hans hjá Palace, kenndi honum að tefla.

Eze og félagar í Palace fá Nottingham Forest í heimsókn í ensku úrvalsdeildinni annað kvöld. Í vetur hefur Eze skorað níu mörk og gefið ellefu stoðsendingar í 38 leikjum fyrir Palace í öllum keppnum.

Palace keypti hinn 26 ára Eze frá QPR fyrir fimm árum. Hann hefur leikið tíu leiki fyrir enska landsliðið og skorað eitt mark.