„Þetta er veikara lið“

KA er spáð 9. sæti Bestu deildar karla í spá íþróttadeildar Vísis og Stöðvar 2. KA-menn enduðu í 7. sæti 2023 og 2024 og urðu bikarmeistarar í fyrra, í fyrsta sinn í sögu félagsins.

„Þetta er veikara lið. Þeir missa Svein Margeir [Hauksson], Daníel Hafsteinsson og Elfar [Árni Aðalsteinsson] er farinn, [Harley] Willard farinn. Það eru stórir póstar farnir úr KA-liðinu og lykilmenn eru orðnir árinu eldri. Rodri er 36 ára, Hallgrímur Mar [Steingrímsson] er 35 ára þannig að þeir eru að mínu mati veikari í ár,“ sagði Albert.

Hann segir ástæðu til að hafa áhyggjur af KA í sumar.

„Klárlega. Við sjáum bara tímabilið 2022 þar sem liðið endaði í 2. sæti, 3. sæti fyrir skiptingu með 43 stig eftir 22 leiki. Þeir fylgja því eftir með 29 stigum og svo 27 stigum í fyrra. Þeir eru búnir að vera að fara svolítið niður og mér finnst hópurinn í ár veikari en þessi tímabil sem ég er að þylja upp,“ sagði Albert.

„Vissulega er gott að fá Jóan Símun [Edmundsen] aftur sem ætti að vera í betra standi heldur en þegar hann kom síðast. Viðar Örn [Kjartansson] þarf að byrja mótið eins og hann endaði það síðast en það þarf miklu meiri breidd þarna. Þetta er að mínu mati veikara lið og undirbúningstímabilið hefur líka verið slappt.“

KA tekur á móti KR í fyrsta leik sínum í Bestu deildinni sunnudaginn 6. apríl.