Gerum góð­verk á Alþjóð­lega hamingju­deginum

Í dag, 20. mars, er Alþjóðlegi hamingjudagurinn haldinn hátíðlegur. Sameinuðu þjóðirnar stofnuðu daginn árið 2012 til að minna á mikilvægi hamingju og vellíðanar í lífi fólks um allan heim og hvetja til aðgerða sem stuðla að jákvæðum breytingum í samfélaginu.

Máttur góðverka

Góðverk eru einföld en áhrifarík leið til að stuðla að jákvæðum breytingum. Smávægilegar og hugulsamar athafnir geta lyft anda annarra og skapað bylgju jákvæðni í kringum okkur. Góðverk minna okkur á mikilvægi samkenndar og mannlegra tengsla – jafnvel lítil góðverk geta haft mikil áhrif.

Rannsóknir hafa sýnt að bæði það að framkvæma og verða vitni að góðverki hefur djúpstæð áhrif á andlega og líkamlega heilsu. Góðverk geta aukið hamingju, dregið úr streitu og haft jákvæð áhrif á hjartaheilsu með því að lækka blóðþrýsting og auka losun vellíðanarhormóna eins og oxýtósíns.

En áhrifin ná enn lengra. Góðverk efla félagsleg tengsl, auka samkennd og styrkja samfélagskennd. Þegar við sýnum góðvild gagnvart öðrum vekjum við ekki aðeins gleði hjá þeim sem njóta góðverksins heldur getur það hvatt þá til að endurgjalda góðmennskuna. Þetta kemur vel fram í meðfylgjandi myndbandi, Pay it forward, þar sem einfalt góðverk leiðir af sér keðjuverkun af hjálpsemi og samstöðu. Á sama hátt getur eitt lítið góðverk frá okkur haft áhrif langt út fyrir þann sem það beinist að og stuðlað að hlýrra, hjálpsamara og samheldnara samfélagi.

Sköpum góðverkabylgju á hamingjudeginum

Á þessum hamingjudegi vil ég hvetja þig til að hefja keðju góðverka með því að framkvæma að minnsta kosti eitt handahófskennt góðverk—hvort sem það er fyrir ástvin eða ókunnuga manneskju.

Til að veita þér innblástur er hér listi af einföldum en kraftmiklum góðverkum sem geta dreift gleði og jákvæðni:

• Skrifaðu hjartnæmt bréf til kennara, vinar eða fjölskyldumeðlims.
• Tíndu rusl í almenningsgarði eða í götunni þinni.
• Leyfðu einhverjum að fara á undan þér í biðröð.
• Bjóddu þig fram til að sinna erindum fyrir vin eða fjölskyldumeðlim.
• Gefðu ókunnugum hrós fyrir fatnað, bros eða jákvæða orku.
• Hjálpaðu einhverjum að bera innkaupapokana út í bíl.
• Bjóddu nágranna að vökva blómin á meðan hann er í burtu.
• Skrifaðu jákvæða umsögn um fyrirtæki eða þjónustu sem þú hefur notið góðs af.
• Bjóddu ferðamönnum að taka hópmynd fyrir þá.
• Deildu fallegri tilvitnun eða skilaboðum á samfélagsmiðlum.
• Gefðu tíma þinn til góðgerðarstarfs eða samfélagsverkefnis.
• Hjálpaðu vinnufélaga óumbeðið.
• Verðu tíma með einhverjum sem gæti fundið fyrir einmanaleika, t.d. öldruðum nágranna.
• Skrifaðu bréf með jákvæðum og hvatningarorðum til einhvers.
• Gefðu bækur, föt eða leikföng til góðgerðarsamtaka.
• Styrktu góðgerðarsöfnun eða hlaupara sem tekur þátt í góðgerðarhlaupi.
• Taktu þátt í fjáröflunarherferð fyrir gott málefni.
• Keyptu litla, hugulsama gjöf handa vini eða vinnufélaga, „bara af því.“

Mundu að það skiptir ekki máli hvort góðverkið er stórt eða lítið—öll góðverk skipta máli og geta skapað keðjuverkum af jákvæðni í samfélaginu.

Hvaða góðverk ætlar þú að framkvæma í dag?

Höfundur er leiðbeinandi hjá Þekkingarmiðlun og með meistaragráðu í hagnýtri jákvæðri sálfræði.