Ung skíða­skot­fi­mi­kona lömuð eftir slys á æfingu

Ekki liggur fyrir nákvæmlega hvernig slysið átti sér stað en þó er ljóst að Widlak klessti á tré sem var 2-3 metrum utan brautarinnar sem hún æfði á.

Áreksturinn olli afar alvarlegum skaða á höfði og mænu. Widlak var um tíma vart hugað líf en er nú úr lífshættu og er líðan hennar stöðug.

Engu að síður er ástand hennar enn grafalvarlegt og líklegast að hún sé lömuð frá mitti og niður, líkt og Agnieszka Cyl, yfirmaður íþróttamála hjá pólska skíðaskotfimisambandinu, sagði við fjölmiðla:

„Ástand okkar ungu skíðaskotfimikonu er afar, afar slæmt. Eftir mænuaðgerð hafa læknarnir sagt að hún eigi eins prósents líkur á að geta nokkurn tímann sest upp sjálf.“

Man ekki sjálf hvað gerðist

Svo virðist sem að Widlak hafi fallið áður en hún lenti á trénu og að hún hafi ekki náð að gera neitt til að draga úr árekstrinum.

Widlak man sjálf ekki nákvæmlega hvað gerðist.

Pólski miðillinn Fakt spurði Tomasz Sikora, fremsta skíðaskotfimimann sem Pólverjar hafa átt, út í slysið og hvort hægt hefði verið að koma í veg fyrir það.

„Ég man eftir alvarlegum slysum í skíðaskotfimi en níutíu prósent þeirra tengjast notkun á vopnum. Vanalega gerast slysin ekki á skíðaæfingum. Ég man að einu sinni féll trjágrein á einhvern eftir að hún brotnaði í sterkum vindi. Ég man hins vegar ekki eftir neinu svona slysi á skíðagöngusvæði,“ sagði Sikora sem telur ekki raunhæft að draga úr slysahættu með því til að mynda að klæða öll tré með dýnum til að draga úr mögulegum höggum.