Segir skipta gríðar­legu máli að fá loðnu­ver­tíð

Í fréttum Stöðvar 2 var fjallað um vaxandi spennu sem er að færast í loðnuleitina. Sjá mátti siglingaferla skipanna fjögurra sem taka þátt í loðnumælingunum.

Leitin byrjaði reyndar ekki vel því hafrannsóknaskipið Árni Friðriksson neyddist um helgina til að liggja í vari undir Grænuhlíð í mynni Ísafjarðardjúps vegna illviðris. Heimaey VE sat sömuleiðis föst inni á Þórshöfn vegna brælu.

Hin leitarskipin tvö, Barði NK og Polar Ammasak, hafa hins vegar verið að leita undan Norðausturlandi og Austfjörðum. Það sem er sérstaklega spennandi að sjá eru þær lykkjur sem sjást koma á leitarferlana. Þær sýna hvar skipin hafa séð loðnu og sett út flottrollið til að rannsaka loðnuna betur.

Þannig sést að Árni Friðriksson er búinn að finna loðnu norður af Húnaflóa. Einnig að Barði NK og Polar Ammasak eru búnir að sjá hana á að minnsta kosti á sjö stöðum á norðaustur- og austurmiðum.

Sérfræðingar Hafrannsóknastofnunar vara þó við því að menn geri sér of miklar vonir á þessu stigi. Leitinni sé ekki lokið og að það verði að bíða eftir niðurstöðu heildarmælingar, sem væntanlega kemur eftir helgi.

Annað kort, frá fyrirtækinu Greenfish, sýnir hvar gervigreind spáir fyrir um að loðnugöngur ættu að vera um þetta leyti. Sú mynd stemmir merkilega vel við hvar leitarskipin hafa verið að sjá loðnuna síðustu daga.

En það er sennilega hvergi meiri spenna en í loðnubyggðunum, sem flestar eru austanlands. Vestmannaeyjar eru þó stærsta loðnuverstöðin en Norðfjörður sú næststærsta.

Í frétt Stöðvar 2 má sjá viðtal við Sigurjón Andrésson, bæjarstjóra á Hornafirði:

Fiskiskipin Ásgrímur Halldórsson og Jóna Eðvalds lágu bæði við bryggju á Hornafirði í dag en þau hafa sinnt loðnuveiðum á undanförnum árum fyrir Skinney-Þinganes, útgerðarfélag Hornfirðinga.

Um níu prósent loðnukvótans eru í höndum Hornfirðinga og er allur aflinn unninn í vinnsluhúsum á staðnum.

Jóna Eðvalds er núna að hálfu komin í eigu Ísfélagsins og verður nýtt sem varaskip. Í staðinn landar Hákon ÞH uppsjávarafla á Hornafirði.