Franska ríkis­stjórnin fallin

Vinstri og hægri flokkar tóku höndum saman gegn Barnier eftir að hann þvingaði óvinsælt fjárlagafrumvarp gegnum þingið án atkvæðagreiðslu þar.

331 þingmaður, af 574, greiddi atkvæði með tillögunni en 288 þingmenn þurfti til.

Samkvæmt frétt France24 er þetta í fyrsta sinn frá 1962 sem vantrauststillaga gegn forsætisráðherra er samþykkt. Þá var Georges Pompidou forsætisráðherra og Charles de Gaulle forseti.

Þó vantrauststillagan hafi verið samþykkt mun Barnier sitja áfram í embætti þar til Emmanuel Macron, forseti, finnur annan mann í embættið. Macron hefur heitið því að finna nýjan forsætisráðherra eins og hratt og auðið er.

Þingmenn á vinstri vængnum í Frakklandi hafa í kvöld kallað eftir því að Macron fari með Barnier og boði til skyndikosninga. Það sé eina leiðin til að leysa pólitíska krísu Frakklands. Macron hefur áður sagt að það komi ekki til greina.

Macron ætlar að ávarpa þjóðina í kvöld.

Marine Le Pen, leiðtogi Þjóðfylkingarinnar í Frakklandi, sem er stærsti flokkurinn á þingi, hefur ekki kallað eftir afsögn Macrons en ítrekaði í kvöld að hann væri undir miklum þrýstingi.

Sjá einnig: Vilja svipta Le Pen frelsinu og kjörgengi í fimm ár

Le Monde segir að þó Le Pen hafi ekki kallað eftir afsögn Macron, þá séu flokksmenn hennar og annarra flokka á hægri vængnum að gera það.

Meðal annars hafa þessir þingmenn lýst Macron í embætti forseta sem liðnu líki og sagt að Barnier sé ekki vandamálið. Það sé Macron sjálfur. Hann sé einangraður forseti með minnihluta á þingi.