Breytt skipu­rit og nýir stjórn­endur hjá Sýn

Í Kauphallartilkynningu frá í dag kemur einnig fram að Gunnar Guðjónsson muni stíga inn í nýtt hlutverk sölu og þjónustu auk þess sem Sigurbjörn Eiríksson muni taka sæti í framkvæmdastjórn en hann hefur veitt innviðum Sýnar forstöðu síðustu ár.

„Við erum sérstaklega ánægð að fá Guðmund H. Björnsson og Gunnar Sigurjónsson til liðs við okkur í þau verkefni sem framundan eru. Þeir koma með dýrmæta reynslu og þekkingu sem mun styrkja stjórnendateymi Sýnar,“ segir Herdís Dröfn Fjeldsted forstjóri Sýnar.

Í tilkynningunni segir að breytingarnar komi í kjölfar stefnumótunar félagsins og sé ætlað að efla samvinnu, auka skilvirkni og styðja við velgengni og vöxt félagsins til framtíðar.

Leitt teymi í markaðssamskiptum og viðskiptaþróun

Guðmundur H. Björnsson mun, eins og fram kom, stýra nýju sviði Upplifunar viðskiptavina. Undir sviðið heyra marksaðs og samskiptamál, vörustýring og verðlagning.

Hann hefur meðal annars leitt teymi í markaðssamskiptum, vöru- og verðstýringu sem og viðskiptaþróun hjá þjónustufyrirtækjum á borð við Símann, 365 og VÍS. Síðastliðin ár hefur Guðmundur starfað sem framkvæmdastjóri Heilsu, dótturfyrirtækis Lyfju. Þar á undan starfaði hann sem framkvæmdastjóri stafrænna umbreytinga og markaðsmála hjá Lyfju. Hann er með B.Sc. í alþjóðamarkaðsfræði frá Tækniháskóla Íslands.

„Ég er mjög spenntur að hefja störf hjá Sýn og taka þátt í þróun félagsins á þessum fjölbreytta og lifandi markaði. Hjá Sýn starfar hæfileikaríkt starfsfólk og ég hlakka til að starfa með því og leggja mitt af mörkum í þeirri vegferð sem framundan er," segir Guðmundur sem mun hefja störf á næstu mánuðum.

Fengist við hugbúnaðarþróun í meira en áratug

Gunnar Sigurjónsson kemur til Sýnar frá Rapyd/Valitor þar sem hann hefur fengist við margvísleg störf á sviði upplýsingatækni og hugbúnaðarþróunar síðustu ellefu ár, nú síðast sem framkvæmdastjóri vöruþróunar- og rekstrarsviðs.

Hann hefur starfað sem ráðgjafi á upplýsingatæknisviði Advania og þar á undan hjá Kögun sem hugbúnaðarsérfræðingur frá árinu 2001. Gunnar lauk meistaragráðu í hugbúnaðarverkfræði frá Háskóla Íslands árið 2013 og bakkalárgráðu í rafmagns- og tölvunarfræði árið 2001 frá sama skóla.

„Ég hlakka til að hefja störf hjá Sýn og að takast á við nýjar áskoranir með frábæru teymi. Ég er þakklátur fyrir það traust sem mér er sýnt og bíð spenntur eftir að kynnast starfseminni betur og að takast á við verkefni í takt við stefnu félagsins. Sýn er öflugt félag sem á heilmikið inni og mun ég leggja mitt af mörkum að efla og styrkja það enn frekar,“ segir hann.

Vísir er í eigu Sýnar.