Biður um meiri pening vegna „fá­rán­legra“ laga

Héraðssaksóknarinn lýsti því yfir í dómsal að hann þyrfti meiri peninga vegna málsins, sem hefði reynst embætti hans mjög kostnaðarsamt. Alríkisyfirvöld Bandaríkjanna hefðu fryst þrettán milljónir dala í sjóðum embættisins árið 2020, áður en hann tók við, vegna rannsóknar.

Ray Tierney, umræddur saksóknari, sagðist þurfa að leita á náðir dómsmálaráðuneytisins því málaferlunum fylgdi gífurlega mikil vinna vegna laga sem hann sagði „fáránleg“.

Giftur íslenskri konu

Þetta var í annað sinn sem Heuermann mætti í dómstól síðan hann var ákærður í fyrra. Hann hefur setið í einangrun í fangelsi frá því hann var upprunalega handtekinn.

Heuermann, sem er 61 árs gamall, er giftur íslenskri konu. Hún sótti um skilnað eftir að hann var handtekinn og ákærður í fyrra en er enn sögð heimsækja Heuermann reglulega. Hún var ekki í dómsal í gær. Samkvæmt lögmanni hennar sem ræddi við blaðamann héraðsmiðilsins ABC 7 var Ása Ellerup í Suður-Karólínu í gær, í persónulegum erindagjörðum.

Michael Brown, lögmaður Heuermann, sagði skjólstæðing sinn spenntan fyrir því að geta sannað sakleysi sitt en að Heuermann væri meðvitaður um að ferlið myndi taka langan tíma.

Fyrst ákærður fyrir þrjú morð

Hann var upprunalega ákærður fyrir að myrða þrjár konur í Gilgo Beach málinu svokallaða. Hann var síðar ákærður fyrir að myrða fjórðu konuna og í sumar var síðan tveimur morðum til viðbótar bætt við.

Í heildina er Heuermann sakaður um að hafa myrt sex konur en mun fleiri lík fundust á svæðinu og er til rannsóknar hvort Heuermann tengist þeim einnig.

Lík fjögurra kvenna fundust á Gilgo Beach árið 2010. Það voru þær Melissa Barthelemy, sem hvarf árið 2009, Megan Waterman sem hvarf árið 2010 og Amber Costello sem hvarf sama ár. Þar að auki var hann ákærður fyrir að myrða Maureen Brainard-Barnes, sem hvarf árið 2007.

Síðar fundust fleiri líkamsleifar á svæðinu sem ekki hefur tekist að tengja við mál Heuermann. Morð þessi hafa gengið undir nafninu „Morðin á Gilgo Beach“ og hafa vakið gífurlega athygli vestanhafs.

Vilja mögulega flytja réttarhöldin

Rannsókn á þessum morðum hafði lengi legið í nokkurskonar dvala þegar sérstakt rannsóknarteymi var stofnað árið 2021. Umfangsmikil rannsókn á símagögnum sem tengdust málinu komu rannsakendum á spor Heuermann.

Hann var svo tengdur við morðin með lífsýnum, vitnisburði, leitum hans á internetinu og öðrum gögnum.

Í sumar var Heuermann svo ákærður í tveimur málum til viðbótar. Hann var ákærður fyrir að myrða Söndru Costilla árið 1993 og Jessicu Taylor árið 2003.

Sjá einnig: Tvær ákærur bætast við í máli Rex Heuermann

Tierney sagði einnig í gær að mögulegt væri að fleiri ákærum yrði bætt við í framtíðinni, enda væru nokkrar rannsóknir enn yfirstandandi.

Brown ítrekaði í dómsalnum að hann og Heuermann vildu að aðskilja ákærurnar sex. Réttað yrði yfir Heuermann vegna morðanna tveggja sem bætt var við málið í sumar sérstaklega. Þær ákærður yrðu aðskilidar hinum fjórum.

Lögmaðurinn sagði að sönnunargögnin í þeim tveimur málum væru sérstaklega léleg. Þá sagði hann einnig til skoðunar að biðja um að réttarhöldin yrðu færð, þar sem ólíklegt væri að Heuermann fengi sanngjörn réttarhöld í Suffolksýslu. Búið væri að „eitra“ málið í hugum mögulegra kviðdómenda.

Mæta næst í dómsal í desember

Næsta fyrirtaka mun fara fram þann 17. desember. Dómarinn sagði í gær að þá vildi hann geta sagt til um hvenær aðalmeðferðin sjálf ætti að hefjast.

Tierney, saksóknarinn, sagði þá dagskrá „metnaðarfulla“ vegna „fáránlegra“ laga sem sneru að því að hann þyrfti að afhenda lögmanni Heuermann hvert einasta bréfsnifsi sem tengdist málinu. Það væri gífurlegt magn, enda væri hægt að rekja málið allt til ársins 1993.

Heuermann mun einnig mæta fyrir dómara í vor, samkvæmt frétt CBS News, en þá ætlar Michael Brown, verjandi hans, að halda því fram að greining á lífsýnum sem bendlaði Heuermann upprunalega við málið, sé gölluð og líkist „töfrum“.

Brown hefur haldið því fram að aðferðin sem notuð var til að tengja hár sem fundust við Heuermann hafi ekki verið sannreynd og að dómarinn þurfi að taka afstöðu gagnvart því.