Senda svifsprengjur fyrir F-16

Samkvæmt heimildum Politico mun pakkinn einnig innihalda skotfæri fyrir stórskotaliðsvopn og loftvarnarkerfi.

Svifsprengjurnar sem um ræðir kallast AGM-154 og geta drifið allt að 113 kílómetra, eftir því úr hvaða hæð þeim er varpað. Þannig er hægt að varpa þeim það langt í burtu að flest loftvarnarkerfi Rússa drífa ekki að orrustuþotunum og geta sprengjurnar fundið skotmörk sín með mikilli nákvæmni.

Rússar hafa um nokkuð skeið notað svipaðar sprengjur gegn Úkraínumönnum með miklum árangri.

Sprengjurnar eru ekki jafn öflugar og stýriflaugar eins og Storm Shadow/Scalp sem Úkraínumenn hafa fengið frá Bretum og Frökkum eða Taurus, sem Úkraínumenn hafa lengi beðið um frá Þýskalandi.

Úkraínumenn hafa eining falast eftir AGM-158 JASSM stýriflaugum frá Bandaríkjunum, sem einnig eru hannaðar með F-16 í huga.

Hér að neðan má sjá flugmann á ástralskri F-16 varpa AGM-154 svifsprengju.

Biðja enn um leyfi til árása í Rússlandi

Úkraínumenn hafa um nokkuð skeið beðið Bandaríkjamenn og aðra bakhjarla sína um leyfi til að nota vopn frá þeim, eins og HIMARS- og ATACMS-eldflaugar og Storm Shadow stýriflaugar til að gera árásir innan landamæri Rússlands. Það hefur hingað til ekki borði mikinn árangur.

Meðal þess sem Úkraínumenn hafa sagt er að slíkar árásir myndu reynast vel við að granda rússneskum vopnum, áður en þeim er skotið að Úkraínu.

Í þessari viku hefur Úkraínumönnum tekist að gera árásir á tvær mismunandi stórar vopnageymslur í Rússlandi þar sem talið er að eldflaugar frá Norður-Kóreu hafi verið geymdar. Í báðum tilfellum er talið að Úkraínumenn hafi notað heimagerða dróna en það hefur þó ekki verið staðfest.

Vólódímir Selenskí, forseti Úkraínu, mun ferðast til Bandaríkjanna á fimmtudaginn og er fastlega búist við því að hann muni færa rök fyrir því að Úkraínumönnum verði leyft að beita vestrænum vopnum í Rússlandi.

Selenskí er sagður ætla að kynna nýja ætlun sína fyrir sigur gegn Rússum en hún er að einhverju leyti sögð byggja á því að Úkraínumenn fái leyfi til árása í Rússlandi. Þá segir AP fréttaveitan að hann muni nota vel heppnaðar árásir vikunnar sem sýnidæmi um það hverju Úkraínumenn gætu áorkað með vestrænum vopnum.

Ráðamenn í Bandaríkjunum hafa lýst yfir áhyggjum af því að slíkt myndi hafa takmarkaðan árangur fyrir Úkraínumenn og að því myndi fylgja hætta á stigmögnun. Þau orð hafa einnig verið látin falla að eldflaugarnar sem um ræðir séu til í takmörkuðum fjölda og að Úkraínumenn séu þegar að framkvæma þessar árásir með sínum eigin langdrægu drónum.