Golfstjarnan stytti sér aldur

Murray var meðal keppenda á PGA-mótinu Charles Schwab Challenge en hætti að spila eftir sextándu holuna á föstudaginn. Ástæðan var sögð vera veikindi.

„Við höfum eytt síðasta sólarhringnum í að sætta okkur við það að sonur okkar er ekki lengur hjá okkur,“ sögðu Eric og Terry Murray í yfirlýsingu.

„Það er óraunverulegt að þurfa ekki aðeins að viðurkenna þetta fyrir okkur sjálfum heldur fyrir öllum heiminum. Þetta er martröð.“

„Lífið var ekki alltaf auðvelt fyrir Grayson og þó að hann hafi stytt sér aldur þá vitum við það að hann hvílir nú í friði,“ sagði enn fremur í yfirlýsingunni.

Grayson Murray var aðeins þrítugur og hafði verið atvinnumaður frá árinu 2015. Hann vann tvö PGA-mót á ferlinum en það síðara var Sony Open á Hawaiieyjum í janúar síðastliðnum. Í framhaldinu komst hann upp í 46. sæti á heimslistanum.

Murray fór í meðferð sumarið 2021 vegna áfengisfíknar. Eftir sigur hans á Hawaiieyjum fyrr á árinu sagðist hann hafa tekið á sínum vandamálum og hafa verið reglusamur í átta mánuði. Samkvæmt nánum vini hans, Webb Simpson, þá hafði Grayson Murray fundið ljósið í lífi sínu og hlakkaði til að giftast unnustu sinni, Christianu.

„Við höfum svo margar spurningar en engin svör. Var Grayson elskaður? Svarið við því er já. Af okkur, af bróður sínum Cameron, af systur sinni Ericu, af stórfjölskyldu sinni, af vinum sínum, af kollegum sínum og að því virðist af mörgum ykkar sem eru að lesa þetta. Hann var elskaður og verður saknað,“ sögðu foreldrarnir í yfirlýsingu sinni.