Jafnaði met mömmu sinnar 29 árum síðar

Thelma Dís Ágústsdóttir, 25 ára dóttir Bjargar, skoraði sex þriggja stiga körfur fyrir Keflavík í 94-91 sigri á Njarðvík í fyrsta leik lokaúrslita Subway deildar kvenna.

Thelma Dís þurfti líka aðeins átta þriggja stiga skot til að skora þessa sex þrista sína og var því með 71 prósent nýtingu fyrir utan þriggja stiga línuna.

Thelma endaði með 29 stig í leiknum og var stigahæsti leikmaður Keflavíkurliðsins.

Með þessu jafnaði Thelma eins og áður sagði met móður sinnar frá því í leik á móti Breiðabliki í mars 1995. Björg þurfti tólf skot til að setja niður þessa sex þrista sínum í leiknum á Sunnubrautinni fyrir næstum því þremur áratugum. Björg endaði leikinn með 27 stig.

Ein önnur íslensk kona hefur náð því að skora sex þrista í einum leik í úrslitaeinvígi því Sigrún Sjöfn Ámundadóttir afrekaði það með Haukaliðinu á móti Keflavík í apríl 2007. Hún þurfti þrettán skot til að ná því.

Ólíkt Björgu og Sigrúnu þá fagnaði Thelma Dís sigri í sínum leik.

Thelma fór þó ekki í gang fyrr en í fjórða leikhlutanum. Eftir þrjá fyrstu leikhlutana var Thelma aðeins með 6 stig og enga þriggja stiga körfu. Hún skoraði aftur á móti tólf stig og þrjá þrista í fjórða leikhlutanum þar sem Keflavíkurliðið tryggði sér framlengingu.

Í framlengingunum tveimur bætti Thelma við ellefu stigum og þremur þriggja stiga körfum. Þar með var hún búin að jafna metið sem móðir hennar setti fyrri 29 árum síðan.

Metið af meðtöldum erlendum leikmönnum á  Brittanny Dinkins sem skoraði átta þriggja stiga körfur fyrir Keflavík á móti Val í lokaúrslitunum 2019. Dinkins bætti þá met hinnar ísraelsku Limor Mizrachi frá 1999 sem skoraði sjö þrista fyrir KR á móti Keflavík.