Sígó eftir hvern hring og undir lokin þurfti að lyfta Mari upp úr stólnum en hún hljóp af stað

Mari kom eins og stormsveipur inn í íslenska hlaupasenu og vakti þjóðarathygli þegar hún hljóp tæpa 300 kílómetra í svokölluðu bakgarðshlaupi þar sem hún kveikti sér í sígarettu eftir hvern einasta hring.

Sigrún Ósk Kristjánsdóttir fylgir Mari eftir í mikilvægasta hlaup hennar til þessa í Þýskalandi, heimsækir eistneska SOS barnaþorpið sem hún ólst upp í og kafar ofan í magnaða sögu þessarar ótrúlegu íþróttakonu í myndinni.

Hlaupið í Þýskalandi síðasta sumar reyndi heldur betur á en Mari var með heljarinnar aðstoðarteymi á svæðinu. Konur sem voru ávallt reiðubúnar að taka á móti henni eftir hvern hring. Þar beið alltaf næring, nudd og sígó.

Í bakgarðshlaupi hleypur hver hlaupari 6,7 kílómetra og hefur til þess eina klukkustund. Ef þú kemur fyrr í mark, þýðir það einfaldlega að þú færð meiri hvíld. Mari var ekki í miklum vandræðum með fyrstu hundrað kílómetrana en eftir það fór að bera á ákveðnum vandræðum. Hún var komin með í magann og ældi til að mynda oft á tíðum á miðjum hring.

En alltaf fór hún aftur af stað á heila tímanum og til að mynd þurfti einu sinni að bera hana að rásmarkinu, en samt hljóp hún af stað.

Hér að neðan má sjá brot úr myndinni sem var á dagskrá í gærkvöldi. Hægt er að sjá myndina í heild sinni í frelsiskerfi Stöðvar 2 og á Stöð 2+ en segja má að ævi Mari hafi verið erfiðari en hjá flestum.