Sirskí segir stöðuna hafa versnað tölu­vert

Í færslu sem hann birti á Telegram í morgun segir Sirskí að hersveitir Rússa reyni að brjóta sér leið í gegnum varnir Úkraínumanna á nokkrum stöðum á víglínunni, með því að nota mikinn fjölda bryn- og skriðdreka. Veður hafi hjálpað Rússum, þar sem búið sé að vera hlýtt og þurrt, sem hentar skriðdrekum vel.

Sirskí segir að þó Rússar hafi orðið fyrir miklu mannfalli sæki þeir fram með nýjum sveitum og nú sé verið að leggja kapp á að ná stöðugleika á víglínunni og hámarka mannfall Rússa. Sérstök áhersla sé lögð á rafrænar varnir gegn drónum og bættar loftvarnir.

Þá hafi verið fyllt á birgðir hermanna af eigin drónum og vopn sem hönnuð eru til að granda bryn- og skriðdrekum, auk þess sem liðsauki hafi verið sendur.

Skotfæraleysi fyrir stórskotalið hefur plagað úkraínska hermenn, sem hafa þó látið Rússa gjalda fyrir framsókn þeirra.

Þá kljást Úkraínumenn einnig við skort á flugskeytum fyrir loftvarnarkerfi og hafa Rússar notað tækifærið til að fjölga loftárásum á úkraínska hermenn á víglínunni, auk þess sem þeir hafa gert umfangsmiklar eld- og stýriflaugaárásir á orkuinnviði Úkraínu.

Undanfarna daga hafa ráðamenn í Úkraínu biðlað til bakhjarla sinna um flugskeyti í loftvarnarkerfi og um fleiri loftvarnarkerfi, eins og Patriot-kerfi, sem Úkraínumenn segjast hafa mikla þörf á til að verja innviði sína og hermenn á víglínunni.

Yfirvöld í Þýskalandi tilkynntu í dag að Þjóðverjar ætluðu að senda þriðja Patriot-kerfið frá þeim til Úkraínu á næstunni. Einnig ætla Þjóðverjar að senda flugskeyti fyrir önnur loftvarnarkerfi til Úkraínu.

Patriot-loftvarnarkerfið hefur verið í notkun frá níunda áratug síðustu aldar en hefur gengið í gegnum umfangsmiklar endurbætur og uppfærslur á þeim tíma og er talið það besta í heimi.

Auk Úkraínu nota sautján ríki heims nota kerfið til loftvarna þeirra á meðal Bandaríkin, Þýskaland, Ísrael, Japan, Holland, Suður-Kórea, Svíþjóð, Spánn, Taívan og Sádi-Arabía. Pólverjar hafa einnig gert samning um að kaupa nokkrum kerfum frá fyrirtækinu Raytheon og samstarfsaðilum þess.

Hart barist í Dónetsk

Hörðustu bardagarnir eiga sér stað vestur af Bakmút, þar sem Rússar gera atlögu að borginni Chasiv Yar og vestur af Avdívka. Rússar hafa sótt hægt fram á báðum stöðum, sem eru í Dónetskhéraði. 

Þykir það til marks um áherslu Vladimírs pútín, forseta Rússlands, um að leggja undir sig allt Dónetskhérað, sem er eitt fjögurra héraða Úkraínu sem Pútín hefur tileinkað Rússlandi með ólöglegri innlimun, að Krímskaga undanskildum.

Úkraínumenn hafa samt miklar áhyggjur af því að ráðamenn í Rússlandi stefni á nýja herkvaðningu. Óttast er að Rússar muni kveðja hundruð þúsunda manna í herinn og nota á til að opna nýjar vígstöðvar við borgina Karkív í norðausturhluta Úkraínu.

Það er næst stærsta borg landsins og liggur hún nærri landamærum Rússlands. Undanfarnar vikur hafa Rússar gert linnulausar árásir á borgina úr lofti.

Sjá einnig: Felldu þrjá slökkvi­liðs­menn með drónum í Karkív

Skotfæraskort Úkraínumanna má að miklu leyti rekja til deilna á Bandaríkjaþingi, þar sem hernaðaraðstoð til Úkraínu og annarra bandamanna Bandaríkjanna hefur strandað í fulltrúadeild þingsins. Bandaríkjamenn hafa ekki sent skotfæri til Úkraínu í um hálft ár en Christopher Cavoli, yfirmaður herafla Bandaríkjanna í Evrópu, varaði við því á þingfundi í vikunni að búist væri við því að Rússar myndu á næstu vikum geta skotið tíu sprengikúlum fyrir hverja sprengikúlu Úkraínumanna.

Rússar hafa aukið framleiðslu verulega og hafa þar að auki keypt mikið magn sprengikúlna frá Norður-Kóreu og Íran.